14/08/2014 12:22:16

DY ARRESTIME PËR TERRORRIZËM

Në pranga imami i xhamise El-Kuddus në Gjilan dhe L. K, nga fshati Polac, (Skenderaj)

PRISHTINË - Dy persona janë arrestuar sot nga forcat e sigurisë në Kosovë, nën akuzat për terrorrizëm. Pas disa muajsh hetime dhe pas arrestimit të katër personave gjatë muajit Qershor në Kaçanik, policia ka filluar një operacion për zbatimin e urdhër kontrollit në dy lokalitete në Gjilan dhe Skenderaj.

Gjatë ketij operacioni ka arrestuar (Z. Q, viti i lindjes 1980, imam në xhaminë El-Kuddus në Gjilan, që dyshohet të jetë një ndër frymëzuesit kryesorë të xhihadit dhe i dyshuari tjetër L. K, viti i lindjes 1987, nga fshati Polac, Skenderaj) nën dyshimin se të njëjtit kanë kryer veprat penale nga kapitulli “Veprat penale kundër rendit kushtetues dhe sigurisë së Republikës së Kosovës”: Rekrutim për terrorizëm, sipas nenit 139 të KPK-së; Organizimi dhe pjesëmarrja në grup terrorist, sipas nenit 143 të KPK-së; Nxitja e urrejtjes, përçarjes ose mosdurimit kombëtar, racor, fetar apo etnik, sipas nenit 147 të KPK-së.

Gjatë zbatimit të urdhërkontrollit, personi i dyshuar Z.Q. nuk ka qenë në shtëpinë e tij, por është gjetur nga Policia e Kosovës i fshehur në veturën e tij në një terren malor në afërsi të shtëpisë së tij, ndërsa i dyshuari i dytë është gjetur në vendbanimin e tij. Gjatë zbatimit të urdhërkontrolleve, janë sekuestruar edhe dëshmi materiale që ndërlidhen me veprat penale. Personave të arrestuar me urdhër të prokurorit të Prokurorisë Speciale iu është shqiptuar masa e ndalimit policor prej 48 orësh.

HermesNews - ©2014

Dërgo me email | Stampo artikullin