22/06/2014 17:16:29

Tensionohet situata në Mitrovicë

Policia përdor gaz lotsjellës për të shpërndarë turmën

MITROVICE - Në Mitrovicë, në pjesen jugore, po zhvillohet sot pasdite një protestë paqësore e paralajmëruar, pëmes rrjeteve sociale, për të kundërshtuar rimbylljen e “Park paqes” të ngritur me vazo betoni ku janë mbjellë fidanë pemesh, në urën kryesore mbi lumin Ibër, në gjysmën e saj nga ana veriore e qytetit, të administruar nga komuna me shumicë serbe.

E paralajmëruar per te nisur në orën 15:00, protesta ka nisur me grumbullime pjesemarresish që kishin ardhur më herët. Protesta po sigurohet nga Policia e Kosovës, EULEX-i, dhe ushtarët e KFOR-it.

Për t’iu shmangur përplasjeve të mundshme ne urë ka forca të shumta të Policisë së Kosovës e të tjera për të ndalë afrimin e qytetarëve në protestën në anën jugore me shumicë shqiptare.

Në këto moment, protestuesit janë nisur nga grumbullimi që kishin te stacioni i Policisë në jug të Mitrovicës, në drejtim të komunës dhe urës. “S’duam park, duam urë, lëvizje e lirë për të gjithë”, është një nga mesazhet e protestuesve.

Në Mitrovicë ministri në detyrë i Punëve të Brendshme të Kosovës, Bajram Rexhepi ka deklaruar gjatë ditës së sotme se policia kosovare në bashkëpunim edhe me forcat e tjera ndërkombëtare të sigurisë është e vendosur që edhe kjo protestë ta kalojë pa ndonjë incident.

“Barrikada e rivendosur në veri nuk mund të largohet me protesta, por këtë e bëjnë institucionet tona në bashkëpunim me faktorët ndërkombëtarë”, është shprehur ai.

Kryetari i komunës së Mitrovicës ne pjesen jugore , Agim Bahtiri, bën të ditur në një deklarë të dërguar se në orët e paradites ka takuar organizatorët dhe janë marrë vesh që protesta të jetë tërësisht paqësore dhe nën kontroll.

“Çdo përshkallëzim i situatës do të ishte në dëm të qytetit të Mitrovicës e të vendit dhe në dëm të procesit që është duke u zhvillua për largimin sa më të shpejt të barrikadës nga ura”, shprehet ai.

Në 18 qershor, herët në mëngjes, serbët larguan barrikadën në anën veriore të urës mbi lumin Ibër, tre vjet pas vendosjes, e më pas po nga ajo anë e po aty vendosën në mesditë “Parkun e paqes” prej fidanësh të mbjellur në vazo betoni, çka shkaktoi reagime në jug kunër rimbylljes së urës për lëvizjen e lirë me barrikadën e re në një formë tjetër.

HermesNews - ©2014

Dërgo me email | Stampo artikullin