13/05/2014 14:19:25

LDK-AKR, drejt bashkëqeverisjes

Pas takimit ndërmjet kryetarit të LDK-së, Isa Mustafa, dhe presidentit të AKR-së, Behxhet Pacolli, LDK-ja dhe AKR-ja në parim janë pajtuar që programet e të dy palëve kanë ngjashmëri dhe garantojnë zhvillim të Kosovës, në interes të qytetarëve të Kosovës

PRISHTINË - Lidhja Demokratike e Kosovës dhe Aleanca Kosova e Re deklaruan mbrëmë se, “kanë zhvilluar takime intensive sa i përket bashkëpunimit për zgjedhjet e 8 qershorit”. “Pas takimit ndërmjet kryetarit të LDK-së, Isa Mustafa, dhe presidentit të AKR-së, Behxhet Pacolli, LDK-ja dhe AKR-ja në parim janë pajtuar që programet e të dy palëve kanë ngjashmëri dhe garantojnë zhvillim të Kosovës, në interes të qytetarëve të Kosovës”, thuhet në deklaratën e dërguar mbrëmë vonë. “LDK-ja dhe AKR-ja do të garojnë të vetme në zgjedhje, ndërkaq detajet e bashkëqeverisjes pas zgjedhjeve do të konkretizohen në ditët në vijim”, përfundon deklarata. Aktualisht, LDK është partia më e madhe opozitare, ndërsa AKR pjesë e Qeverisë së mandatit të dytë, në largim, të kryeministrit të Kosovës e kryetarit të PDK-së, Hashim Thaçi.

HermesNews - ©2014

Dërgo me email | Stampo artikullin