13/05/2014 14:16:24

Fillon java e filmit kosovar

Ky event vjen në kuadër të bashkëpunimit në fushën e artit dhe kulturës mes dy vëndeve tona

TIRANE - “Java e Filmit Kosovar në Tiranë” është aktiviteti që u çel mbrëmë në Ambientet e Muzeut Historik Kombëtar.

Organizuar nga nga Arkivi Qëndror Shtetëror I Filmit dhe me mbështetjen dhe kujdesin e Ministrisë së Kulturës së Shqipërisë e Ministrisë së Kulturës të Kosovës, ky event vjen në kuadër të bashkëpunimit në fushën e artit dhe kulturës mes dy vëndeve tona.

Të ftuar në ceremoninë e hapjes ishin edhe regjisori kosovar Ekrem Kryeziu, një nga regjisorët e parë të Kosovafilmit që përfaqëson kinemanë kosovare të dy epokave, edhe të Kosovafilmit por edhe aktualen, si dhe aktori i shumë filmave kosovarë, sërish i dy epokave, Çun Lajçi.

Aktiviteti që ka për qëllim prezantimin e kinematografisë kosovare, pasi u hap nga drejtoresha e Arkivit Qendror Shtetëror të Filmit, Elvira Diamanti, si dhe pas fjalës së rastit të Ministres së Kulturës Mirela Kumbaro, filloi me shfaqen e filmit “Kodi i jetës” me regji të Ekrem Kryeziut.

Ndërkohë që do të vijojnë të shfaqen edhe shtatë filma të tjerë për publikun shqipëtar deri në datën 16 maj, prodhuar nga kinematografia kosovare, në kuadër të nismës për thellimin e bashkëpunimit kulturor mes Kosovës dhe Shqipërisë.

Kinemaja e retrospektivës do të vijojë sot me shfaqjen e filmit të prodhuar nga “Kosovafilm” në vitin 1988 “Rojet e mjegullës”, me regji të Isa Qosjes. Ndërsa në ditën e tretë të këtij aktiviteti(pra nesër) do të shfaqen tre filma me metrazh të shkurtër të regjisorëve të rinj si “Muri” i Gazmend Nelës, “Gjakmarrja” e Luan Kryeziut dhe “Suxhuk Open” e Burbuqe Berishës.

Të enjten, publiku shqiptar do të ketë rastin të shohë filmin “Lepuri me pesë këmbë” të regjisorit Ismail Ymeri në kuadër të retrospektivës së kinemasë, ndërsa në ditën e fundit të javës së filmit kosovar pra në date 16 maj, do të shfaqen filmat e regjisorëve të rinj kosovarë “Kolona” e Ujkan Hysajt dhe “Amel” i More Raçës.

HermesNews - ©2014

Dërgo me email | Stampo artikullin