07/05/2014 12:38:06

Kërcënohen gjyqtari dhe prokurori për rastin e FAN-it

Presioni nuk ka qenë vetëm nëpërmjet deklaratave nëpër media, por presioni vjen në forma të ndryshme të kërcënimit. Në rastin e arrestimit të zyrtarëve, ndër ta dhe të një deputeti të Kuvendit të Kosovës, konsiderojmë se presioni ka ardhur ndaj zyrtarit hetues të rastit

PRISHTINE - Koordinatori nacional i antikrimit ekonomik, Shqipdon Fazliu ka thënë se gjyqtari dhe prokurori i rastit “Fan” janë kërcënuar dhe u është bërë presion në forma të ndryshme. Sipas tij Prokurori Hivzi Bajrakari është dashur që të përcillet nga Kryeprokurori i PRTH-së, Imer Beka, deri në Gjykatë, pasi që ka qenë i frikësuar nga kërcënimet.

Arrestimet që u bënë për shkak të rastit të privatizimit të fabrikës “Fan”në Podujevë, ku nga ky rast janë ngritur kallëzime penale ndaj 12 zyrtarëve të dyshuar, ku ndër ta është edhe deputeti i LDK-së, Naser Osmani, është shoqëruar nga presione dhe kërcënime ndaj prokurorit të çështjes Hivzi Bajraktari dhe ndaj gjyqtarit të procedurës paraprake, Vehbi Kashtanjeva.

Këtë gjë e konfirmon koordinatori nacional i antikrimit ekonomik Shqipdon Fazliu, i cili thotë se për këtë rast, presioni ka ardhur në forma të ndryshme.“Konsideroj se është një rast vërtetë i madh, një rast me prioritet kombëtarë. Kryeprokurori i PRTH-së, Imer Beka, i ka ofruar mbështetje prokurorit Hivzi Bajraktari, duke e përcjellë vetë deri në objektin e Gjykatës, ku është mbajtur seanca për caktimin e paraburgimit, sipas kërkesës së prokurorit, nga frika sqë kishte nga kërcënimet. Në këtë rast ka pasur dhe ka presion të përditshëm si ndaj prokurorit Hivzi Bajraktari, ashtu edhe ndaj gjyqtarit të çështjes, Vehbi Kashtanjeva”,

“Presioni nuk ka qenë vetëm nëpërmjet deklaratave nëpër media, por presioni vjen në forma të ndryshme të kërcënimit. Në rastin e arrestimit të zyrtarëve, ndër ta dhe të një deputeti të Kuvendit të Kosovës, konsiderojmë se presioni ka ardhur ndaj zyrtarit hetues të rastit”, ka thënë Fazliu, raporton Kosova Sot. //RTK//

HermesNews - ©2014

Dërgo me email | Stampo artikullin