25/04/2014 17:14:01

Vendime të rëndësishme të qeverisë

Projektligji për mbrojtjen juridike dhe mbështetjen financiare të personave të akuzuar potencial në proceset gjyqësore pranë Gjykatës Speciale është dokumenti i parë

PRISHTINE - Qeveria e Republikës së Kosovës, e drejtuar nga kryeministri Hashim Thaçi, miratoi sot disa vendime dhe dokumente të politikave qeveritare nga fushat e saj të përgjegjësive kushtetuese dhe ligjore.

Projektligji për mbrojtjen juridike dhe mbështetjen financiare të personave të akuzuar potencial në proceset gjyqësore pranë Gjykatës Speciale është dokumenti i parë, i cili ka marrë aprovimin e kabinetit qeveritar.

Ky projektligj ka për qëllim mbrojtjen juridike dhe mbështetjen financiare të personave të akuzuar potencial në proceset gjyqësore dhe procedurat e ndërlidhura, për krimet e pretenduara pranë Gjykatës Speciale.

Dispozitat e këtij projektligji zbatohen ndaj çdo personi, i cili akuzohet për krimet e pretenduara në proceset gjyqësore pranë Gjykatës Speciale, duke përfshirë mbrojtjen juridike për personat e akuzuar dhe mbështetjen financiare të anëtarëve të ngushtë të familjes së tyre për udhëtimet që ndërlidhen me procedurat gjyqësore.

Në funksion të përmbylljes së procesit të transformimit të Forcës së Sigurisë së Kosovës dhe krijimit të Forcës së Armatosur të Kosovës, Qeveria e Kosovës ka aprovuar sot projektligjin për plotësimin dhe ndryshimin e ligjeve që ndërlidhen me këtë proces. Gjithsej do të ndryshohen 38 ligje, që kryesisht kanë të bëjnë me emrin, misionin dhe funksionet e Forcave të Armatosura të Kosovës.

Kryeministri Hashim Thaçi i bëri thirrje të gjithë spektrit politik të Kuvendit të Kosovës, nga kryesia e Kuvendit të Kosovës, që të fusë në rendin e ditës dhe të miratojë vendimin për themelimin e Forcave të Armatosura të Kosovës.

“Nëse kjo nuk ndodhë tani, Kosova do të humbasë edhe shumë vite në krijimin e forcave të saj të armatosura”, tha kryeministri Hashim Thaçi. Ai shtoi se vendimin e deputetëve të Kuvendit të Kosovës janë duke e pritur edhe qendrat e vendosjes ndërkombëtare në Uashington dhe Bruksel. “Çdo vonesë në këtë drejtim është e pajustifikueshme”, u shpreh Thaçi.

HermesNews - ©2014

Dërgo me email | Stampo artikullin