13/04/2013 20:12:47

'Kujdestari e përhershme' e serbëve në veri

Policia e Kosovës ka shtuar praninë e saj, por jo edhe të pjesëtarëve të Rosu, nëpër lagjet me popullatë të përzier në veri të Mitrovicës

PRISHTINË - Në veri të Kosovës, në magjistrale në Rudare te Zveçani "serbët sot kanë vazhduar kujdestarinë e përhershme, të filluar mbrëmë, shkaku i lëvizjeve të njësive speciale të policisë kosovare, Rosu".

Këtë e raportojnë mediat serbe, sipas të cileve, përfaqësuesit e shtabeve të krizës në katër komunat serbe të veriut të Kosovës dje kanë vendosur që të "përforcojnë kujdestarinë në lokacione potencialisht të rrezikshme për shkak të pranisë intensive dhe lëvizjes së njësive speciale Rosu,që janë nën komandën e qeverisë së Kosovës".

Ndërsa, sipas medias kosovare, Policia e Kosovës ka shtuar praninë e saj, por jo edhe të pjesëtarëve të Rosu, nëpër lagjet me popullatë të përzier në veri të Mitrovicës, për shkak të incidenteve të cilat kanë ndodhur kohët e fundit në këtë pjesë të qytetit.

Që para mëse një muaji, përfaqësuesit e komunës së Mitrovicës në takimin e Komitetit të Sigurisë përshëndetnin shtimin e masave të sigurisë në veri nga Policia e Kosovës dhe EULEX-i, duke theksuar se patrullimet e përbashkëta kanë ndikuar edhe në sigurinë e qytetarëve.

Nga fillimi i këtij viti, në veriun e Kosovës të dominuar nga serbët e strukturat e tyre paralele kanë ndodhur rreth 30 shpërthime e incidente të tjera me armë zjarri. Një shpërthim, pa pasoja në njerëz, ka ndodhur sot në orët e mëngjesit në komunën e Zveçanit.

HermesNews - ©2013

Dërgo me email | Stampo artikullin