02/04/2013 17:43:46

Fillon takimi vendimtar ne Bruksel

Ky takim, që besohet të jetë 'përfundimtari', është i teti mes kryeministrit serb Ivica Daçiç dhe atij kosovar Hashim Thaçi

BRUKSEL - Një takim vendimtar mbi normalizimin e marrëdhënieve mes Serbisë dhe Kosovës ka nisur pak minuta më parë në Bruksel, nën kryesimin e Bashkimit Europian, që synon në arritjen medoemos të një kompromisi mbi autonominë e kufizuar të veriut të Kosovës, ku serbët kanë shumicën e popullsisë.

Ky takim, që besohet të jetë "përfundimtari", është i teti mes kryeministrit serb Ivica Daçiç dhe atij kosovar Hashim Thaçi në Bruksel që prej fillimit të bisedimeve në tetor të vitit 2012.

"Besoj se duhet me doemos të arrihet një marrëveshje, edhe pse nuk do të jetë një rrugëtim i thjeshtë", deklaroi kryediplomatja europiane, Catherine Ashton, në një komunikatë të bërë dje. "Nuk duhet ta lëmë këtë mundësi të shpërdorohet", theksonte ajo.

''Ashtu si gjatë takimeve paraardhëse, Ashton do të zhvillojë bisedime të veçanta me dy krerët e qeverive, përkatësisht asaj serbe, Ivica Daçiç dhe asaj kosovare Hashim Thaçi, para një takimi tripalësh'', njoftoi një zëdhënëse.

Takimi mund të zgjasë për më shumë se disa orë, ashtu si ai i fundit, që përfundoi në mesnatën e 20 marsit, rrjedhimisht përfundimi mbetet ende i paqartë.

Presidenti serb, Tomislav Nikoliç, u shpreh dje pesimist lidhur me arritjen e një marrëveshjeje, duke paraqitur si shkak qëndrimin ''jo të gatshëm për kompromise'' të paraqitur sipas tij nga pala kosovare.

''Deklaratat e ardhura nga Prishtina tregojnë qartë mbi qëndrimin e tyre të pakthyeshëm dhe që na vendos praktikisht përpara faktit të kryer dhe këto nuk janë shenja shumë inkurajuese'', theksoi ai.

Dy palët duhet të arrijnë akorde mbi organizimin dhe drejtimin e bashkive dhe komunave me shumicë popullsie serbe, kryesisht përreth qytetit të Mitrovicës, në veri të Kosovës.

Pjesa më e madhe e rajonit është larguar nga kontrolli i Prishtinës, pesë vite pas shpalljes së pavarësisë së Kosovës, të cilën Serbia nuk e njeh. Beogradi kërkon krijimin e një ''bashkësie'' komunash me shumicë popullsie serbe që do të kishin ''pushtet ekzekutiv'' për sigurinë e tyre, për policinë dhe drejtësinë, hap që deri tani Prishtina e ka refuzuar disa herë.

Thaçi po ashtu ka deklaruar se edhe në rast krijimi ''kjo bashkësi komunash nuk do të kishte në asnjë moment pushtet ekzekutiv apo legjislativ".

Nëse arrihet përfundimisht një marrëveshje, Serbia shpreson të marrë një datë të saktë për hapjen e negociatave për anëtarësimin e Beogradit në Bashkimin Europian gjatë samitit evropian të qershorit, ndërkohë Brukseli duhet të publikojë një progresraport vlerësimi për Serbinë në mes të muajit prill.

Ndërsa Kosova, shpreson të marrë një sinjal pozitiv lidhur me një afrim në të ardhmen me BE-në, që aktualisht duket tepër i largët.

HermesNews - ©2013

Dërgo me email | Stampo artikullin