08/03/2013 18:59:09

Jahjaga dekoron mësueset e para

Për kontributin e dhënë në emancipimin e gruas përmes arsimimit dhe edukimit të saj, dekorohen me Medaljen Presidenciale të Meritave mësueset e para që kanë punuar në Kosovë

PRISHTINË - Me rastin e festave të 7 e 8 Marsit, Presidentja e Republikës së Kosovës, Atifete Jahjaga dekoroi femra të shquara për punën e tyre në fushën e arsimit.

Për kontributin e dhënë në emancipimin e gruas përmes arsimimit dhe edukimit të saj, dekorohen me Medaljen Presidenciale të Meritave mësueset e para që kanë punuar në Kosovë.

Në kuadër të kësaj feste, Presidentja Jahjaga vizitoi në shtëpinë e saj veteranen e arsimit në Kosovë, Nadire Dida. Në Ditën Ndërkombëtare të Gruas Presidentja Jahjaga vlerësoi lart punën dhe angazhimin e madh të mësueseve të para në Kosovë, që dhanë kontribut të jashtëzakonshëm në emancipimin e femrës në Kosovë, përmes arsimimit dhe edukimit.

Presidentja Jahjaga tha se mësueset e para, në mesin e të cilave edhe veterania e arsimit në Kosovë, Nadire Dida, gjatë dhe pas përfundimit të Luftës së Dytë Botërore, nuk kursyen mundin për të arsimuar gjeneratat e tëra në Kosovë, dhe posaçërisht për të zhvilluar dhe avancuar pozitën e femrës në shoqërinë tonë.

Nadire Dida, veterane e arsimit, e falënderoi presidenten Jahjaga për vizitën dhe për kujdesin e shprehur dhe e përgëzoi për punën e saj në përfaqësimin e shtetit të Kosovës. Gjatë ditës së sotme, Presidentja Jahjaga priti në Zyrën e saj edhe Nexhmije Pagarushën, artisten e njohur në Kosovë.

HermesNews - ©2013

Dërgo me email | Stampo artikullin