01/03/2013 10:56:20

Shpërthim në veri të Mitrovicës

Misioni i BE-së për sundimin e ligjit EULEX, këtë javë, i ka bërë thirrje publikut të ndihmojë në zbardhjen e sulmeve me granata në veri të Kosovës

PRISHTINË - Në veri të Mitrovicës mbrëmjen e djeshme persona të panjohur aktivizuan një mjet shpërthyes në dritaren e shtëpisë së një qytetari të komunitetit boshnjak, por fatmirësisht nuk ka patur të plagosur.

"Në momentin e shpërthimit në shtëpi ndodheshin shtatë veta, por asnjë nuk është plagosur", raporton media nga vendngjarja, ku pas incidentit kanë shkuar pjesëtarë të Policisë së Kosovës, të EULEX-it dhe ushtarë të KFOR-it.

Misioni i BE-së për sundimin e ligjit EULEX, këtë javë, i ka bërë thirrje publikut të ndihmojë në zbardhjen e sulmeve me granata në veri të Kosovës.

"EULEX-i dhe Policia e Kosovës janë duke punuar së bashku në hetimin e këtyre sulmeve. Gjatë javëve të fundit pas një numër sulmesh të tilla në veri të Kosovës, policia e Kosovës dhe e EULEX-it kanë rritur masat e sigurisë dhe patrullimet, si dhe kanë nisur hetimet", theksohej në një komunikatë.

Komiteti i Sigurisë i komunës së Mitrovicës të hënën vlerësonte se në veri të qytetit më të madh verior të Kosovës gjendja vazhdon të jetë e tensionuar si pasojë e shpërthimeve dhe incidenteve të shpeshta.

HermesNews - ©2013

Dërgo me email | Stampo artikullin