19/02/2013 13:26:19

Nis sot takimi i 5-te Kosove-Serbi ne Bruksel

Takimet në kuadër të dialogut do të nisin diku kah mesdita kur, sikur edhe më parë, Baronesha Ashton do t’i takojë bilateralisht Thaçin dhe Daçiqin, për të vazhduar më vonë me takimin Thaçi-Daçiq me lehtësimin e Ashton

PRISHTINË - Në Bruksel zhvillohet sot e nesër takimi i pestë, i dyti në 2013-ën, i kryeministrit të Republikës së Kosovës, Hashim Thaçi, me kryeministrin e Serbisë, Ivica Daçiq, në procesin e dialogut për normalizimin e marrëdhënieve Kosovë-Serbi, nën kryesimin e BE-së e mbështetur nga SHBA-të, në vazhdimësi të tre takimeve të vitit 2012 - të 19 tetorit, 7 nëntorit e 4 dhjetorit, si dhe takimit të 17 janarit këtë vit.

Gjatë qëndrimit në Bruksel, kryeministri Thaçi do të zhvillojë takime me Presidentin e Bashkimit Europian, Herman Van Rompuy, me Presidentin e Komisionit Evropian, Jose Manuel Durao Barroso, si dhe me Përfaqësuesen e BE-së për Politikë të Jashtme, Baroneshën Catherine Ashton, ndërsa me ndërmjetësimin e Baroneshës Ashton zhvillohet takimi i Thaçi-Daçiç.

Burimet zyrtare qeveritare në Kosovë paralajmëronin edhe një takim mbrëmë në Bruksel të kryeministrit Thaçi në një darkë pune me Zëvendës ndihmës Sekretarin Amerikan të Shtetit për Evropën Qendroredhe Jugore, Philip Reeker.

Sipas burimeve qeveritare në Prishtinë, në takimet me zyrtarët e lartë të BE-së dhe SHBA-ve, kryeministri Thaçi do t'i prezantojë të arriturat e Kosovës në 5 vite pavarësi, si dhe përkushtimin e qeverisë së Kosovës për integrimet evropiane.

Në mbledhjen e qeverisë dje pasdite, kryeministri i Kosovës tha se edhe në raundin e ri të bisdimeve në Bruksel, “përkushtimi ynë, pozicioni ynë, qëndrimet tona do të jenë shumë të qarta, për zgjerimin dhe ushtrimin e gjithë autoritetet tonë shtetëror në çdo cep të territorit të Republikës, për rend dhe ligj, për zhvillim ekonomik, për investime socio-ekonomike, që të kemi zgjedhje të lira edhe në veri, që të kemi shpërbërjen e plotë të strukturave të sigurisë, dhe integrimin e komunitetit serb në institucione dhe jetën shoqërore të Kosovës”.

“Është në interesin e të gjithëve, që shtetet tona, shteti i Kosovës dhe Serbisë, të ndërtojnë fqinjësi të mirë, si parakusht i domosdoshëm për evropianizimin e gjithë rajonit, dhe integrimin e dy shteteve tona sovrane në NATO dhe Bashkim Evropian”, tha Thaçi.
Ai siguroi se, “të gjitha përgjegjësitë kosovare do të jenë kushtetuese dhe ligjore”, ndërsa theksoi se “ne duam të besojmë se ky proces nën udhëheqjen e Bashkimit Evropian dhe mbështetjen e fuqishme të Shteteve të Bashkuara të Amerikës, do të përmbyllet me njohjet reciproke si dy vende sovrane, në mënyrë që të përmbyllet ai kapitull, ajo periudhë njëqindvjeçare e problemeve dhe konflikteve, dhe të hapet periudha e njohjes reciproke, e bashkëpunimit reciprok, dhe natyrisht e normalizimit të plotë të gjithë rajonit tonë”.

“Hapen diskutimet e rënda për veriun e Kosovës”, është një nga kryetitujt sot në shtypin kosovar, në raportimet nga Bruksel para takimit më të ri Thaçi-Daçiq. Raportohet se kryeministri Thaçi takimet në Bruksel të martën do t’i nisë me kryetarin e Komisionit Evropian, Jose Manuel Barroso, ndërsa pas këtij takimi do të pritet edhe nga presidenti i Këshillit Evropian, Herman van Rompuy.

“Ky takim do të jetë një rast për të shqyrtuar rrugën e Kosovës në proceset e integrimeve evropiane. Po ashtu kryetari Barroso me kryeministrin Thaçi do të bisedojnë edhe për dialogun mes Kosovës dhe Serbisë, të cilin po e lehtëson zëvendëskryetarja e Komisionit dhe përfaqësuesja e lartë Catherine Ashton”, ka paralajmëruar zëdhënësja e Komisionit Evropian, Pia Ahrenkilde Hansen.

HermesNews - ©2013

Dërgo me email | Stampo artikullin