18/02/2013 19:10:18

Bruksel, raundi i 5-te i bisedimeve

Thaçi, 'është në interesin e të gjithëve që shtetet tona, Kosova dhe Serbia, të ndërtojnë fqinjësi të mirë'

PRISHTINË - Raundi i ri, i pestë, i bisedimeve Kosovë-Serbi në nivel kryeministrash në Bruksel, do të zhvillohet në dy ditët e ardhshme, nesër dhe pasnesër, bëri të ditur pak më parë në mbledhjen e qeverisë kryeministri Hashim Thaçi, i cilim sipas burimeve zyrtare qeveritarem do të ketë takime edhe me zyrtarët më të lartë të Bashkimit Evropian.

Kreu i qeverisë kosovare theksoi se "është në interesin e të gjithëve që shtetet tona, Kosova dhe Serbia, të ndërtojnë fqinjësi të mirë, si parakusht i domosdoshëm për europianizimin e gjithë rajonit dhe integrimin e të dy shteteve tona sovrane në NATO dhe Bashkim Europian".

"Të gjitha përgjegjësitë tona do të jenë kushtetuese e ligjore dhe ne duam të besojmë që ky proces, nën udhëheqjen e BE-së dhe mbështetjen e fuqishme të SHBA-ve, do të përmbyllet me njohjet reciproke si vende sovrane", u shpreh kryeministri Thaçi në mbledhjen e qeverisë ksosovare, të parën në fillimin e vitit të gjashtë të pavarësisë së vendit.

Zv/kryeministri Hajredin Kuçi, pas mbledhjes së qeverisë, tha se kryeministri i Kosovës do të ketë takime në dy ditët e ardhshme me kryeministrin e Serbisë, Daçiç dhe Baroneshën Ashton, si dhe takime të tjera në Bruksel.

"Kryeminsitri do të ketë takime nesër me zyrtarët më të lartë të BE-së, ku do të diskutohet jo vetëm raporti Kosovë-Serbi, por më shumë raporti i Kosovës me BE-në dhe rruga e integrimeve në Bashkimin Evropian. Presim që të jemi shumë konkretë në zgjidhjet që i takojnë shpërbërjes së strukturave ilegale të sigurisë, në ndërprerjen e financimit të tyre, në shpërbërjen e atyre strukturave dhe në vendosjen e autoritetit të plotë të institucioneve qëndrore të Kosovës edhe për veriun e vendit", deklaroi zv/kryeminsitri Kuçi.

HermesNews - ©2013

Dërgo me email | Stampo artikullin