29/08/2014 10:55:40

Rikthehet futbolli i rërës

Kampionati në Gjirin e Lalzit kishte të paktën katër vjet që futbolli i rërës ishte fshirë nga lista e aktiviteteve sportive, që nga koha që atë e pat organizuar ish-presidenti i shoqatës kombëtare të minifutbollit shqiptar, Alfred Ziaj

HermesNews - Për rreth tre vjet, që nga 2008-2010, ky kampionat është zhvilluar me një pjesëmarrje të gjërë në kompleksin “Gjikuria” në Drimadhas. Sivjet ky kampionat është marrë përsipër nga shoqata sportive e minifutbollit shqiptar, që drejtohet nga presidentit Klodian Kadiu, edhe sepse vitin e ardhshëm organizohen Lojërat e sporteve të ujit e të rërës në Peskara. Që do të thotë se Shqipëria, jo vetëm në volejboll në plazh, apo dhe disiplina të tjera sportive, por dhe në futbollin e rërës. Nxitjen për ta bërë shoqata sportive e minifutbollit shqiptar këtë kampionat të futbollit të rërës, që sipas organizatorëve do të jetë nën mbikëqyrjen e Federatës Shqiptare të Futbollit dhe në mënyrë të veçantë të presidentit të saj Armand Duka, e ka dhënë Komiteti Olimpik Kombëtar Shqiptar. Mbi të gjitha presidenti i saj Viron Bezhani, i cili do të jetë ndër të ftuarit në ceremoninë e hapjes së këtij kampionati, që sot do të nisë në ora 12:00 në kompleksin “Mateo” në Gjirin e Lalzit. Gjithashtu janë të ftuar ministrja e Arsimit dhe e Sportit, Lindita Nikolla; ministrja e Turizmit dhe e Zhvillimit Urban, Eglantina Gjermeni; zëvendësministri i Arsimit dhe i Sportit, Rauf Dimraj; drejtori i përgjithshëm i turizmit bregdetar Auron Tare. Në këtë aktivitet do të marrin pjesë klubet më me traditë të futbollit të sallës shqiptare Teuta, Edro Vlora, KS Ali Demi, Olimpik Tirana. Jo vetëm kaq, por dhe skuadra si “Bedem Futboll Klub”, Internacional etj. “I gjithë qëllimi i aktivitetit është jo vetëm kthimi i traditës së mirë të futbollit të rërës në vend, por dhe krijimi i një skuadre dinjitoze të Shqipërisë në këtë disiplinë për aktivitetet ndërkombëtare”, ka thënë presidenti Klodian Kadiu, kurse kështu kthehet dhe futbolli i rërës në vendin tonë.

HermesNews

Dërgo me email | Stampo artikullin