19/05/2014 09:01:28

Flamurtari fiton Kupën e Shqipërisë

Skuadra e Flamurtarit ka fituar mbrëmë Kupën e 62-të të Shqipërisë

TIRANË - Flamurtari është shpallur fitues i Kupës së 62 të Shqipërisë pas fitores në finale me skuadrën e Kukësit.

Vlonjatët kanë fituar me rezultatin 1 me 0 gjatë një gare të zhvilluar mbrëmë në “Qemal Stafa” ku pjesën më të madhe regjistroi një volum loje më të madh nga lojtarët e Kukësit.

Arbër Abilaliaj shënoi golin e parë dhe të vetëm të lojës pak para se të mbyllet pjesa e parë dhe rezultati nuk ndryshoi më. Triumfoi pragmatizmi dhe qetësia e kuqezinjve të Ernest Gjokjës, që përkundrejt problemeve të fundit me largimet e dy titullarëve, portierit Shpëtim Moçka dhe mbrojtësit Erjon Dushku, ia ka dalë të superojë me sukses “artilerinë e rëndë” kuksiane.

Kësaj fitoreje i është bashkangjitur dhe Kryeministri Edi Rama i cili është deputet i zgjedhur në qarkun e Vlorës. Me anë të një mesazhi në rrjetin social “Twitter”, Rama ka uruar Flamurtarin për titullin. “Flamurtari në kupat e Europës si fitimtar i Kupës së Republikës urime nga zemra Vlorës.”- citohet në mesazhin e kryeministrit.

Verilindorët zhvilluan volum të madh loje, krijuan edhe raste të volitshme për shënim, por vuajti në finalizim. Boja dhe Cikalleshi nuk ishin në gjendje të kurorëzonin mundin dhe djersën e ekipit të Kukësit, që dështojnë në finalen e tyre të parë në histori në Kupën e Shqipërisë. Kukësi i kënaqet kurorës së nënkampionit, ndërsa vlonjatët me fitimin e Kupës së Shqipërisë sigurojnë pjesëmarrjen në Europa League.

Flamurtari është shpallur kampion i Shqipërisë në sezonin 1990-1991, ndërsa e ka fituar Kupën e Shqipërisë katër herë, në vitin 1985, 1988, 2009 dhe së fundmi në vitin 2014.

HermesNews - ©2014

Dërgo me email | Stampo artikullin