26/02/2014 17:06:04

''Nepunesi'' publikohet ne fletoren zyrtare

Maxhoranca vlerëson se vendimi në fjalë i Gjykatës Kushtetuese nuk sjell asgjë të re për vendimet e marra në administratën publike për shkarkim-emërimet e deri sotme

TIRANE - Qendra e Botimeve Zyrtare botoi sot vendimin e Gjykatës Kushtetuese për pavlefshmëri të Aktit Normativ të Qeverisë për “Ligjin e nëpunësit civil”.

Publikimi i vendimit në fjalë u paralajmërua një ditë më parë nga Ministri i Shtetit për Marrëdhëniet me Parlamentin, Ilirjan Celibashi, gjatë një prononcimi për mediat në përfundim të Konferencës së Kryetarëve, ku u përcaktua kalendari tre javor i punimeve të Kuvendit. Celibashi shprehu gatishmërinë e Qeverisë për të respektuar vendimet e Gjykatës si detyrim Kushtetues.

Referuar publikimit të pritshëm të vendimit në fletoren zyrtare, Konferenca e Kryetarëve, në mbledhjen e djeshme, e cila u braktis nga opozita, mori vendim për shtyrje të shqyrtimit të amendamenteve në seancë dhe në komisionet përkatëse parlamentare.

Maxhoranca vlerëson se vendimi në fjalë i Gjykatës Kushtetuese nuk sjell asgjë të re për vendimet e marra në administratën publike për shkarkim -emërimet e deri sotme.

Pas publikimit në fletoren zyrtare të vendimit, ndërsa foli për “ligjin e nëpunësit civil”, deputeti socialist, Armando Subashi, tha për mediat se, “vendimi i Gjykatës Kushtetuese, nuk ka fuqi prapavepruese, e për rrjedhojë vendimet e marra deri më tani janë të vlefshme”.

Opozita në vijimësi ka denoncuar mospublikimin në fletoren zyrtare të këtij vendimi të Gjykatës Kushtetuese. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin