24/01/2014 23:46:31

Abedin, mbaj shënim!

Adnan Januzaj vazhdon që javë pas jave të kthehet në një personazh në Angli dhe Europë

HermesNews - Adnan Januzaj vazhdon që javë pas jave të kthehet në një personazh në Angli dhe Europë. Kjo paraqitje e mrekullueshme për një djalosh 18- vjeçar, siç është ky shqiptar me origjinë nga Istogu, por edhe një mjegullnajë që ekziston për të ardhmen e tij, e ka kthyer në personazh të mediave jo vetëm në vendin tonë, por edhe në Europë. E ardhmja e pasigurt për klubin e tij të ardhshëm më në fund u zgjidh, edhe pse na mbajti të mbërthyer pas lajmeve që e lidhnin emrin e tij me shumë prej skuadrave të njohura europiane. Por tani ai lidhet vetëm me Mançester Junajtid dhe milionat që fiton aty. Tashmë duhet të vendosë edhe Kombëtaren ku do të luajë. Ndërkohë janë 10 milionë zemra shqiptare, të cilat kërkojnë që vetë Adnani të zgjedhë me zemër dhe të luajë për Kombëtaren kuqezi. Përpara disa javësh babai i Adnanit, i cili ka në dorë edhe të ardhmen e një prej talenteve më të mëdhenj të momentit, Abedini, u shfaq “live” për të gjithë shqiptarët. Kështu, për herë të parë pas shumë hamendësimeve dhe mjegullnajave që na ishin krijuar në shtyp, ai u shfaq dhe të gjithë ishim besimplotë se Abedini do të na sqaronte, sepse jo vetëm është babai i Adnanit, por njëkohësisht edhe menaxheri i tij dhe vetë Adnani në respekt të traditës shqiptare i ka lënë dorë të lirë babait për të vendosur të ardhmen e tij. Por, duke ndjekur intervistën ekskluzive dhe të shumëndjekur të Abedinit, m’u rikthye në mendje filmi “Këshilltarët” dhe batuta e këtij filmi: “Abedin, mbaj shënim”. Në fakt, Abedini vetëm foli, duke na lënë më turbull se ishim, pasi ishim ne ata që mbajtëm shënime të gjithë pa përjashtim, nga drejtues të federatës dhe deri te tifozi më i thjeshtë shqiptar, sepse bëhet fjalë Adnan Januzajn, ndoshta talenti më i madh që ka pasur ndonjëherë kombi shqiptar. Ajo që u pa gjatë kësaj interviste ishte se Abedini ishte gjatë gjithë kohës konfuz, nervoz dhe i paqartë, duke thënë njëra pas tjetrës batuta që fshinin njëra-tjetrën ashtu si pa kuptuar. Akuzoi federatën tonë për joprofesionalizëm, dhe kjo nuk ishte diçka e re për ne dhe as nuk është i pari që po e bën. Edhe djemtë e tjerë “shqiptarë”, që më pas kanë zgjedhur një tjetër kombëtare, Dukën dhe federatën e kanë cilësuar si fajtore për vendimin e tyre. Të jetë e vërtetë kjo? Sigurisht që është një justifikim. Si mundet familja Xhaka dërgon një djalë te Zvicra dhe tjetri shprehet gati për të ardhur te Shqipëria. Është e njëjta federatë, i njëjti Dukë. Por Kombëtarja jonë është gjithnjë zgjedhja e radhës për talentet shqiptare në Europë. Ndoshta këtë ishte duke na treguar edhe Abedini ashtu mes rreshtave. Tha se FSHF nuk e kishte kontaktuar asnjëherë, por më vonë tregoi se kapiteni dhe simboli i kësaj Kombëtareje, Lorik Cana, kishte shkuar ta takonte Abedinin. A nuk është ky një kontakt? Pranoi se ishte telefonuar nga FSHF…, po ky nuk është kontakt Abedin? Trajneri De Biazi pak kohë më parë i dërgoi “sms” në tri gjuhë dhe nuk ktheu përgjigje…, po ky a nuk është kontakt Abedin? Ftesën kërkoi që t’i vinte te Mançester Junajtid, por si mundet FSHF-ja të dërgojë ftesë për një futbollist që nuk ka pasaportën shqiptare?! Por kulmi ishte kur Abedini akuzoi për mungesë profesionalizmi jo vetëm federatën tonë (u munduam ta besonim), por edhe atë belge. Një federatë që falë djemve emigrantë si Adnani, të natyralizuar si belgë, kanë krijuar një nga 10 kombëtaret më të mira të botës. Po ashtu tregoi se nëse Adnani nuk vishet kuqezi, është faji i Dukës, a thua se Duka do të jetë përjetë zoti i futbollit shqiptar. Si mundet një shqiptar si Abedini, vëllai i të cilit ka luftuar për UÇK-në, për inat të një personi të presë në mes ëndrrën e më shumë se 10 milionë shqiptarëve për ta parë Adnanin të veshur kuqezi?! Po ashtu Abedini, ashtu si kishin bërë edhe më parë baballarët e shqiptarëve të tjerë me origjinë nga Kosova, tha se në momentin që Kosova do të njihet nga FIFA, ata do të kthehen aty dhe Adnani do luajë për Kosovën, por nëse nuk pranon Shqipërinë, vështirë se do të pranojë Kosovën. Si në Kosovë, si në Shqipëri jemi njësoj shqiptarë dhe kjo vlen edhe për Adnanin. Në fund, Abedini na tregoi se do të bisedonte vetëm me njerëz profesionistë, pa na përcaktuar se kush mund të jenë këta. Ndoshta kërkon trajnerin për të parë projektin kuqezi, ndoshta vetëm këtu do i jepja të drejtë… Por problemi është se tani nuk i përgjigjet as trajnerit?! Çfarë duhet të mendojnë shqiptarët tani? Ndërkohë që vazhdoi të tregonte “profesionalizmin” e tij se për çdo informacion që kishte nga Shqipëria dhe programet e shumta të transmetuara për djalin e tij, asnjëherë nuk e kishte ndjekur personalisht, por dikush tjetër ia kishte sugjeruar ta shihte. E prapëseprapë ai kishte qenë i painteresuar ta shihte, por mjaftohej me shprehjen “më thanë kështu apo ashtu”. A vepron kështu një profesionist, Abedin? Dhe në fund rikthehemi te fillimi pra, te batuta “Abedin, mbaj shënim”, pasi ne shënuam gjithçka ti the, edhe pse ndoshta sërish asgjë nuk kuptuam ose ngelëm aty ku ishim. Jo për fajin tonë, por sepse qartësia jote linte për të dëshiruar. Loja jote Abedin ishte ajo e përhershmja: mos e prish me askënd e ta kesh mirë me të gjithë, se asnjëherë nuk i dihet. Ndoshta ti Abedin po pret Anglinë, por duke njohur konservatorizmin e popullit anglez dhe legjislacionin e vështirë atje, le të qëndrojnë me dyert gjysmë të hapura Shqipëria apo Belgjika. Atëherë, pasi ke përjashtuar Turqinë, Kroacinë dhe Serbinë, të mbeten tri alternativa bindëse: Anglia, Shqipëria dhe Belgjika, ndaj deri në momentin që ti do vendosësh, media do aludojë ndoshta edhe në mënyrë joprofesionale. Kështu Abedin, tregohu ti profesionist! I vetmi problem për mungesën e një përgjigjeje ishte përqendrimi tek e ardhmja me klubet. Tashmë Adnani edhe për pesë vjet do të jetë “djall i kuq”. I mungon vetëm ta shpallësh “shqiponjë”. Abedin, Adnani qysh në këtë moment është i famshëm dhe nuk ndryshon asgjë kombëtarja ku do të luajë. Nëse do të shkojë diku tjetër, do të jetë një nga futbollistët e mirë të Anglisë apo Belgjikës. Në Shqipëri mund të kthehet në hero dhe i adhuruar nga të gjithë. Një projekt me Januzajn në qendër do të sillte “po” edhe nga shumë talente të tjerë shqiptarë në Europë. Këtu Adnani mund të kthehet në udhëheqësin e kësaj Kombëtareje, e cila për herë të parë në historinë e saj mund të arrijë në një event të madh ndërkombëtar. Abedin, na duhet një “PO” e jotja dhe e Adnanit, dhe jo justifikime për t’iu larguar thelbit. Nuk kemi Kombëtaren më të mirë në botë, as edhe një stadium të denjë për të, nuk kemi një federatë me të cilën mund të krenohemi, por diçka e kemi të përbashkët ne, ti dhe Adnani: kemi gjakun dhe ngjyrat që ëndërrojmë. Adnani është shqiptar dhe duhet të luajë për Shqipërinë. Ai do të jetë një ambasador i yni në Europë dhe ndoshta do të na dërgojë në Botëror një ditë. Nëse je vërtet profesionist dhe patriot, do mendoje si gjithë shqiptarët e tjerë dhe do na sillje Adnanin nën petkun kuqezi. Këtë mbaje shënim Abedin…
Na ndiqni dhe në Facebook dhe Twitter

Elton Çela

Dërgo me email | Stampo artikullin