01/12/2013 21:56:00

Futboll: Vllaznia-Kukësi 1-2

Pjesa e parë ka folur më mirë për kuqeblutë vendase

SHKODËR - Një ndër sfidat më të rëndësishme të javës së 13-të të kategorisë Superiore të futbollit shqiptar, ajo Vllaznia-Kukësi, e luajtur të dielen në stadiumin Loro Boriçi, është mbyllur me fitoren e skuadrës mysafire me rezultatin 1- 2.

Pjesa e parë ka folur më mirë për kuqeblutë vendase, të cilët jo vetem se kaluan në avantazh të parët në minutën e 35-të me anë të Semines, por edhe kontrolluan më shumë lojën. Miqtë nga Kukësi, vetem pas pësimit të golit kanë filluar të lëvizin më shumë në fushën e lojës, por pa mundur të shënojnë në portën e malazezit të Vllaznisë, Vujadinoviç.

Ndërkohë, pjesa e dytë është krejt tjetër për skuadrën mike nga Kukësi, e cila ka kryer edhe një zëvendësim duke larguar nga fusha rumunin Kristian Dragoi dhe duke aktivizuar në vend të tij, serbin Llazar Popoviç.

Shameti në të 53-tën minutë barazon me kokë pas një goditje nga këndi të ekzekutuar nga Hoxha. Vllaznia përpiqet të reagojë pas pësimit të golit duke regjistruar dy raste të njëpasnjëshme në porten e Halilit të Kukësit, por do të jenë sërishmi kuksianët, që këtë radhë me anë të serbit Popoviç shënojnë golin e dytë në minutën e 75-të, gol qe mbeti në fuqi si goli i fitores së krejt ndeshjes nga ana e Kukësit.

Në konferencen për shtyp pas ndeshjes, trajneri Agim Canaj i Vllaznisë u shpreh pozitivisht në përgjithësi për lojën e të tijve, ndërkohë që vuri në dukje së rishmi gabimet e pafalshme në mbrojtje e kane ndeshkuar Vllaznine. Ndersa tekniku i Kukesit, kosovari me pasaportë turke, Naxhi Shensoi, duke vlerësuar lojën e futbollistëve të tij, pranoi se tashmë me fitoren e katërt radhazi që skuadra që ai drejton realizoi në Shkodër, është e denjë për të pretenduar në fitimin e titullit kampion. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin