20/08/2013 12:32:30

Këmbimi valutor rrit të ardhurat e bankave

Sipas BSH-së, para pesë vjetësh, të ardhurat nga këmbimi valutor zinin më pak se 5% të të ardhurave totale të bankave

TIRANE - Banka e Shqipërisë vëren se vitet e fundit, në strukturën e të ardhurave në sistemin bankar peshën kryesore po e zë fitimi nga veprimet e këmbimit valutor. Sipas BSH-së, para pesë vjetësh, të ardhurat nga këmbimi valutor zinin më pak se 5% të të ardhurave totale të bankave. Por pas fillimit të krizës ndërkombëtare financiare, struktura e të ardhurave e sistemit bankar shqiptar ndryshoi ndjeshëm. Të ardhurat nga interesat pësuan rënie të ndjeshme, ndërsa u rrit me ritme të shpejta pjesa e të ardhurave nga transaksionet valutore. Në gjysmën e parë të këtij viti, të ardhurat nga veprimet me valutën përbënin 26% të totalit të sistemit bankar. Pikun maksimal pesha e fitimeve nga valutat e arritën në vitet 2010 dhe 2011, kur përbënin 33 deri në 34% të totalit. Deri në vitin 2009, të ardhurat nga komisionet zinin mesatarisht rreth 7% të totalit, ndërsa pas vitit 2009 kanë zbritur pranë nivelit 4%.

HermesNews - ©2013

Dërgo me email | Stampo artikullin