09/08/2013 12:35:22

Obama bën thirrje për reforma strukturore në Greqi

''Ne dëshirojmë të bëjmë të mundur që qytetarët grekë të shohin dritë në fund të tunelit'', nënvizoi Obama

WASHINGTON - Presidenti amerikan, Barack Obama bëri thirrje për një politikë të orientuar drejt rritjes ekonomike në Greqi, duke theksuar përballë kryeministrit grek, Antonis Samaras se politikat e kursimit nuk mund të ishin strategjia e vetme për daljen nga kriza. Presidenti amerikan dhe kryeministri grek, Samaras, të cilët u takuan në Zyrën Ovale gjatë pasdites, theksuan rëndësinë e reformave në Greqi, e cila iu nënshtrua një plani drastik ristrukturimi për uljen e nivelit të borxhit që këtë vit arriti në 176 për qind të PBB-së. "Kam besim se kryeministri Samaras do të ndjekë zbatimin e reformave strukturore", deklaroi Obama.

"Ne jemi gjithashtu dakord mbi faktin se para vështirësive të tilla si ato me të cilat përballet Greqia, ne nuk mund ta konsiderojmë kursimin si strategjinë e vetme të mundshme", shtoi ai. "Është gjithashtu e rëndësishme që politikat të përqendrohen tek rritja ekonomike dhe punësimi, sepse historia ka treguar që vendet me një ekonomi në rritje dhe një nivel të lartë punësimi e kanë më të thjeshtë të ulin nivelin e borxhit se sa vendet ku njerësit nuk kanë më shpresë", theksoi presidenti amerikan.

"Ne dëshirojmë të bëjmë të mundur që qytetarët grekë të shohin dritë në fund të tunelit", nënvizoi Obama. "Ne duhet të këmbëngulim mbi rritjen ekonomike dhe krijimin e vendeve të reja të punës, veçanërisht për të rinjtë, niveli i papunësisë së të cilëve është më shumë se 60 për qind", u shpreh kryeministri grek, Samaras. "Po kalojmë një periudhë shumë të vështirë dhe sakrificat e qytetarëve grekë janë të mëdha, por jo të kota", theksoi ai.

HermesNews - ©2013

Dërgo me email | Stampo artikullin