09/05/2013 16:20:53

Më pak probleme me kreditë: bankat raportojnë sinjale pozitive

Të dhënat nga Banka e Shqipërisë bëjnë të ditur se institucionet kryesore mikrofinanciare në vend (Fondi Besa; Unioni SHKK; Shoqëria e Parë Financiare e Zhvillimit FAF Sh.a dhe NOA ) kanë raportuar ritme të ulëta zgjerimi të portofoleve të kredisë gjatë 2012-s

TIRANE - Institucionet mikrofinanciare raportojnë gjatë vitit 2012 një nivel shumë më të ulët të kredive me probleme, në raport me sistemin bankar. Sipas raportimeve të institucioneve mikrofinanciare, portofoli në risk rezulton midis 5-8%, kur në sistemin bankar, niveli i huave me probleme ka arritur në rreth 23%.

Të dhënat nga Banka e Shqipërisë bëjnë të ditur se institucionet kryesore mikrofinanciare në vend (Fondi Besa; Unioni SHKK; Shoqëria e Parë Financiare e Zhvillimit FAF Sh.a dhe NOA ) kanë raportuar ritme të ulëta zgjerimi të portofoleve të kredisë gjatë 2012-s, me përjashtim të Fondit Besa, i vetmi që ka shënuar rritje dyshifrore, duke sjellë si rezultat dhe kujdes në stanjacion e kredive me probleme.

Sipas Bankës së Shqipërisë, deri në vitin 2012 pjesën më të madhe të portofolit të mikrofinancës e zotërojnë institucionet financiare jo bankë, që ushtrojnë aktivitet huadhënës në vend, me rreth 68% të totalit, të ndjekura nga shoqëritë e kursim-kreditit, me 29% të totalit dhe institucionet financiare jobankare për dhënien e mikrokredisë zënë vetëm 3%.

Ekspertët e fushës vlerësojnë se zhvillimet e fundit ekonomike dhe ngërçi i kredive ka detyruar mikrofinancën të ngadalësojë rritjen e portofolit të mikrokredisë. Vitet 2013-2014 do të jenë kyç për të provuar qëndrueshmërinë e mikrofinancës ndaj trazirave makroekonomike, shprehen ata.

Zana Konini, drejtore ekzekutive e Unionit SHKK, thotë se "viti 2012 është karakterizuar nga një stanjacion apo ngadalësim i rritjes së aktivitetit të mikrofinancës në vend. Ajo që vihet re është se ritmet e rritjes së kredisë kanë qenë më të ulëta në krahasim me periudhat e mëparshme".

Fondi Besa është institucioni më i madh financiar jo bankë në vend, i orientuar në mikrofinancë, duke zotëruar rreth 33% të portofolit të kredisë prej 15 miliardë lekësh të mikrofinancës. Aktori i dytë më i madh është Unioni SHKK, me 25% të portofolit të mikrofinancës në total (dhe 82% të portofolit total të unioneve të kursim kreditit), i ndjekur nga NOA dhe FAF, që zotërojnë përkatësisht nga 18% dhe 16% të portofolit të huasë.

HermesNews - ©2013

Dërgo me email | Stampo artikullin