25/04/2013 10:40:33

13 projektet e konvertimit të borxhit

Ministria e Financave dhe ambasada italiane kanë prezantuar të 13 projektet e përzgjedhura, që i përkasin kryesisht sektorëve si arsimi, shëndetesia dhe perfshirja sociale

TIRANE - Programi Italo-Shqiptar i Konvertimit të Borxhit për Zhvillim ka përzgjedhur 13 projektet e para, që përfitojnë financime. Ky program po zbaton një vendim të qeverisë italiane, që interesat e borxhit, afërsisht në vlerë 18 milionë euro, që i ka qeveria shqiptare të investohen në Shqiperi per përmirësimin e jetës së qytetareve.

Ministria e Financave dhe ambasada italiane kanë prezantuar të 13 projektet e përzgjedhura, që i përkasin kryesisht sektorëve si arsimi, shëndetesia dhe perfshirja sociale, me vlerë 4,5 milionë euro. Ato orientohen në nxitjen e zhvillimit ekonomik dhe rural, arsimit dhe mbështetjes sociale.

Të 13 projektet përfshijnë hapësirën gjeografike nga Veriu, në Jug të vendit dhe lidhen me rikonstruksione shkollash, dhurimi i sigurtë i gjakut dhe për zhvillim rural, kryesisht nisma private në sektorin bujqësor dhe agrokulturë.

Ministri i Financave, Ridvan Bode, vlerëson faktin që "në përzgjedhjen mes 93 projekteve të paraqitura u ndoqën dy kritere kryesore vlerësimi: vizibiliteti i efekteve sociale dhe qëndrueshmëria në kohë e tyre".

Ambasadori Italian, Massimo Gaiani, është shprehur i kënaqur për masivitetin e projekteve që u paraqitën në program dhe cilësinë e lartë të tyre. "Jemi të kënaqur nga mënyra si u prit programi i konvertimit të borxhit. Kemi pasur shumë aplikime, të gjitha shumë cilësore", tha Gaiani.

Programi Italo-Shqiptar i Konvertimit të Borxhit për Zhvillim arriti që brenda një muaji të bëjë një përzgjedhje efikase të projekteve në përputhje me kriteret që ka caktuar ky program.

HermesNews - ©2013

Dërgo me email | Stampo artikullin