06/11/2014 14:21:26

Ulet mosha për minatorët

Ish minatorët që sot përfitojnë 9,000 lekë trajtim të veçantë financiar do të shohin një rritje të madhe të të ardhurave të tyre, pasi falë këtij ligji rreth 75% e tyre do të përfitojnë pension në masën 14,474 lekë në muaj

TIRANE - Ministri i Mirëqenies Sociale dhe Rinisë, z. Erion Veliaj, deklaroi sot në Parlament se projektligji për minatorët jo vetëm që ul moshën e daljes në pension me 5 vjet, por nga ana tjetër rrit përfitimet e të gjithë atyre ish minatorëve, të cilët deri më tani kanë përfituar trajtim të veçantë financiar.

“Ish minatorët që sot përfitojnë 9,000 lekë trajtim të veçantë financiar do të shohin një rritje të madhe të të ardhurave të tyre, pasi falë këtij ligji rreth 75% e tyre do të përfitojnë pension në masën 14,474 lekë në muaj. Pjesa tjetër, si edhe ata minatorë që do të dalin me këtë ligj në pension, do të përfitojnë pensione mujore akoma edhe më të larta, deri në masën 21,000 lekë në muaj. Tani, se me çfarë llogarie opozitës i del 9.000 lekëshi më i madh se 14.000 apo 21.000 lekëshi, kjo shkon përtej habisë time. Por, kjo është arsyeja pse i dreqosën financat e vendit”, u shpreh ministri Veliaj gjatë prezantimit të projektligjit në Kuvend.

Duke iu përgjigjur pretendimeve të opozitës se me projektligjin në fjalë përfitojnë vetëm 150 individë, z. Veliaj publikoi listën e 3840 minatorëve që preken nga ligji, të cilëve iu ulet mosha e daljes në pension, si dhe iu rriten përfitimet.

Veliaj tha se sipas diskutimeve të bëra në Këshillin Kombëtar të Punës, përfaqësues të industrisë minerare dhe sindikatave kanë rënë dakort për të rritur kontributin në masën 5% të pagës nga të cilat 3% do të paguhen nga punëdhënësi dhe 2% nga punëmarrësi.

“Ky kontribut shtesë shënon hapin e parë drejt skemave profesionale në Shqipëri, ku punëtorët e një ndërmarrjeje apo një industrie kontribuojnë më shumë për të përfituar një pension më të lartë ose në një moshë më të re. Kjo masë pritet të kontribuojë në buxhetin e ISSH një shumë prej afro 50 milion lekë apo 500 mijë dollarë në vit. Efektet financiare vjetore të këtij projektligji arrijnë në 793 milionë lek ose rreth 8 milionë dollarë, por barra reale mbi buxhetin e shtetit është shumë më e ulët se kaq”, tha ai.

Lista e qyteteve (dhe e emrave) me 3840 minatorët që përfitojnë ulje të moshës së daljes në pension dhe dyfishimin e pensionit:

Durrës 163
Dibër 5
Bulqizë 391
Mat 103
Elbasan 14
Librazhd 200
Fier 13
Lushnje 6
Gjirokastër 8
Memaliaj 179
Korçë 226
Pogradec 368
Devoll 11
Ersekë 43
Kukës 263
Has 15
Lezhë 35
Kurbin 34
Mirditë 100
Shkodër 37
Pukë 69
Tiranë1448
Kavajë 6
Vlorë 80
Sarandë 23

HermesNews - ©2014

Dërgo me email | Stampo artikullin