13/10/2014 16:00:12

Vendimet për 2015tën me FMNnë

Paketa e re fiskale ende në diskutim. Lehtësim proçedurash për sipërmarrësit vitin që vjen

TIRANE - Në Washington ka filluar takimi i vjeshtës me FMNnë dhe Bankën Botërore ku merr pjesë dhe Shqipëria. "Diskutimet nuk bëjnë fjalë për paketë rritjesh taksash, por balancim të tyre", tha Ministri i Zhvillimit ekonomik, tregtisë dhe sipërmarrjes, Arben Ahmetaj.

Një paketë fleksibël ajo me Fondin që varet nga shumë parametra në diskutim, por sidoqoftë Qeveria është e vendosur për konsolidim fiskal. "Marrëveshja, siç e kemi theksuar me Fondin Monetar, është një marrëveshje rritjeje ekonomike. Nuk është një marrëveshje shtrënguese", tha Ahmetaj për Zërin e Amerikës. Shqipëria garanton se nuk ka folur për një pakete rritje taksash por balancim.

"Para tre javësh ne kaluam një rritje të akcizës së duhanit me qëllim frenimin e konsumit të duhanit e përputhur edhe me gjithë fushatën tonë kundër duhan pirjes në Shqipëri. Dhe kjo ishte dhe pjesë e paketës fiskale, e cila ishte kërkuar në fakt nga qeveria shqiptare", tha ai.

Në horizont taksa të reja për të ardhurat personale, por jo për pagat."Dua ta theksoj, ne nuk kemi asnjë qëllim që të prekim të ardhurat personale nga paga. Ajo që kemi bërë vitin e kaluar, ajo është finalja. Pra, ajo lëvizje fiskale që ne bëmë në 2014, ajo është finalja për sa i përket pagave. Pjesa tjetër ka të bëjë me dividentin, ka të bëjë me të ardhurat nga qiratë", siguron Ahmetaj.

Parashikohet po ashtu dhe një çlirimi procedurash me biznesin të kërkuara nga sipërmarrja në diskutim të mëparshëm qeverinë. "I kemi kaluar një për një. Shumicën e tyre i kemi pranuar dhe besoj se ajo paketë do ta lehtësojë jetën e biznesit edhe njëherë. Pra, janë rreth 20 pika të cilat, të kërkuara nga shoqatat, përfaqësuesit e sipërmarrjes, janë studiuar me kujdes dhe do jenë pjesë e paketës fiskale per vitin 2015", thotë ministri shqiptar.

HermesNews - ©2014

Dërgo me email | Stampo artikullin