02/10/2014 19:17:40

Flitet prapë për 21 Janarin

''I pandëshkuari më i madh, i akuzuar zyrtarisht për vjedhjen e mbi $220 milionë në rrugën Durrës-Kukës, i pandëshkuar për cënimin e sovranitetit territorial të vendit me marrëveshjen e detit me Greqinë, i pandëshkuar për vrasjen e 4 qytetarëve më 21 janar, ky është vetë kreu i PD-së, Lulzim Basha, i cili sot po bëhet aleat me krimin''

TIRANË - Ministri i Brendshëm, Sajmir Tahiri, reagoi sot në Parlament pas akuzave të opozitës një ditë më parë lidhur me nxjerrjen e identitetit të dëshmitarit të mbrojtur nga drejtësia, në vrasjen e kryekomisarit Dritan Lamaj. Duke marrë fjalën në seancën e sotme plenare, Tahiri akuzoi opozitën se me qëndrimin që po mban ndaj policisë së shtetit po bëhet aleat me krimin dhe pandëshkueshmërinë, ku i pandëshkuari më i madh, sipas tij, është vetë kryetari i PD-së, Lulzim Basha. "I pandëshkuari më i madh, i akuzuar zyrtarisht për vjedhjen e mbi $220 milionë në rrugën Durrës-Kukës, i pandëshkuar për cënimin e sovranitetit territorial të vendit me marrëveshjen e detit me Greqinë, i pandëshkuar për vrasjen e 4 qytetarëve më 21 janar, ky është vetë kreu i PD-së, Lulzim Basha, i cili sot po bëhet aleat me krimin", u shpreh ministri Tahiri në Kuvend. Ai i bëri thirrje opozitës që të heshtë dhe ta lërë policinë e shtetit të punojë, e cila sipas tij, ka dhënë prova se do të luftojë krimin dhe paligjshmërinë ashtu siç bëri me aksionin në Lazarat.

HermesNews - ©2014

Dërgo me email | Stampo artikullin