26/09/2014 16:38:07

Do të promovojmë më të mirët

Ministri Naço takon koordinatorin e zyrës antikorrupsion George Kent. Figurat më të mira të sistemit të drejtësisë do të promovohen në publik

TIRANË - Në Shqipëri ka filluar të shëmbet muri i pandëshkueshmërisë, tha të premten, Ministri i Drejtësisë, Nasip Naço. Deklarata erdhi gjatë një takimi me George P. Kent, Koordinator për Antikorrupsionin në Byronë e Çështjeve të Europës. Në nisje të takimit Naço u ndal në masat e luftës kundër korrupsionit. Hap i parë në përgjigje të kësaj situate, ishte përfshirja e publikut në luftën kundër korrupsionit, duke ju krijuar mundësinë qytetarëve që përmes portalit të denoncimeve online, të kishin mundësi për të dhënë një kontribut të drejtpërdrejtë dhe të denonconin korrupsionin në çdo nivel. Ky hap i parë u shoqërua në vazhdim edhe me ndërmarrjen e disa nismave ligjore, të cilat kanë nisur të japin edhe rezultatet e para. "Për herë të parë në këto 20 vite sillen përpara drejtësisë gjyqtarë të akuzuar për veprën penale të korrupsionit, dhe kjo është një dëshmi që sistemi po nis të reflektojë për nevojën e shembjes së murit të pandëshkueshmërisë", theksoi Naço. Kent tha se ka hasur në një interes të madh të shoqërisë civile për t’u përfshirë në proçeset reformuese. Idenë e Ministrit Naço për të evidentuar figurat më të mira të sistemit dhe për t’i promovuar ata edhe në publik, Kent e vlerësoi maksimalisht, duke vunë në dukje se idea për të dalluar më të mirët duhet mbajtur në konsideratë pasi shpesh shpenzohet më shumë kohë për të dënuar të keqen pa u vënë re e mira. "Është me rëndësi që ndonjëherë të kemi edhe një axhendë pozitive", beson Kent.

HermesNews - ©2014

Dërgo me email | Stampo artikullin