26/09/2014 15:57:42

Kostot dhe perfitimet e integrimit

Prezantohet studimi i qendres shqiptare për konkurrueshmërinë dhe tregtinë ndërkombëtare (ACIT)

TIRANË - Ministrja e Integrimit europian, Klajda Gjosha, mori pjesë sot në prezantimin e studimit “Një analizë e kostove dhe përfitimeve të procesit të integrimit të Shqipërisë në Bashkimin Europian”. Ky studim është realizuar nga Qendra Shqiptare për Konkurrueshmërinë dhe Tregtinë Ndërkombëtare (ACIT). Ministrja Gjosha, në fjalën e saj përshëndetëse theksoi se analiza të kësaj natyre janë me shumë vlerë jo vetëm për të kuptuar më në brendësi procesin e integrimit, por shërbejnë edhe si burim informacioni e të dhënash referuese që ndihmojnë për të kapërcyer sfidat që ky proces mbart. Në emër të qeverisë shqiptare, Ministrja shprehu mbështetjen për çdo iniciative që i shërben integrimit të vendit, në mënyrë që të kapërcehet kjo sfidë e madhe sa më shpejt. “Duke ofruar ekspertiza të tilla, i shërbehet nxitjes së ritmit të reformave integruese dhe orientimit të duhur, për të pasur një qasje sa më të mirë në të gjitha hallkat e procesit”, tha Ministrja Gjosha. I Ngarkuari me Punë i Delegacionit të BE-së në Shqipëri, Clive Rumbold, theksoi “Është e provuar se përftimet e drejtpërdrejta të qytetarëve nga procesi i integrimit në BE, janë të mëdha. Është e provuar se integrimi është rruga e duhur. Gjëja më e rëndësishme për Shqipërinë është si të përfitojë sa më shumë dhe sa më shpejt nga ky proces”, tha Rumbold.

HermesNews - ©2014

Dërgo me email | Stampo artikullin