20/09/2014 17:27:28

Trajno trajnuesin

Seminar trajnues për stafin policor

TIRANE - Sekretariati i Përgjithshëm i Interpol-it, përmes programit TAIEX, në datat 15-19 Shtator 2014, zhvilloi në Tiranë, një trajnim operacional në kuadër të Projektit FORMATRAIN, gjatë të cilit ekspertë të mjeteve motorrike nga vende të ndryshme ndanë eksperiencat me specialistë të Policisë së Shtetit të strukturave kundër trafiqeve të paligjshme, me qëllim vendosjen e një standarti trajnimi. Në këtë trajnim nuk janë marrë vetëm njohuri teorike në lidhje me çdo aspekt të këtij lloj krimi sa i përket trafikimit të mjeteve motorrike, por specialistët e Policisë Shqiptare të trajnuar do të jenë në gjendje të ndajnë njohuritë e tyre me kolegët, në sajë të programit “trajno trajnuesin”. Njohuritë e marra në këtë trajnim gjetën zbatim në terren, ku nga Interpoli dhe stukturat e Policisë së Shtetit u organizua një operacion për verifikimin e makinave në terren, me synim zbatimin në praktikë të njohurive të marra në kuadër të këtij trajnimi. Si rezultat i këtij operacioni në Tiranë u kontrolluan 210 mjete dhe nga verifikimet e kryera u bllokuan 4 prej tyre, të cilat rezultonin të ishin mjete të vjedhura apo humbura, të shpallura në kërkim nga Interpoli. Në përfundim të trajnimit 17 specialistët e Policisë Shqiptare të strukturave kundër trafiqeve, u pajisën me çertifikata nga Sekretariati i Përgjithshëm i Interpol-it.

HermesNews - ©2014

Dërgo me email | Stampo artikullin