16/09/2014 17:47:08

BE dhe referendumi ne Skoci

Komisioni Europian refuzon të komentojë sondazhet e fundit që nxjerrin barazim ''jo''-në dhe ''po''-në

BRUKSEL - Duke iu trembur pasojave, Bashkimi Evropian e ka të vështirë ta fshehë nervozizmin e tij përballë perspektivës së një pavarësie të Skocisë dhe po përdor kërcënimin e përjashtimit të Edimburgut nga unioni.

Javën e kaluar një zëdhënës i Komisionit Evropian refuzoi të komentojë sondazhet e fundit që nxjerrin barazim “jo”-në dhe “po”-në duke theksuar se bëhej fjalë për një çështje të brendshme.

Por presidneti, Jose Manuel Barroso, në shkurt mori kritikat e skocezëve që kërkojnë pavarësi kur ai deklaroi se “do të jetë shumë e vështirë, gati e pamundur për një Skoci të pavarur t’i bashkohet BE-së”.

“Do të jetë shumë e vështirë të arrihet një marrëveshje me të gjitha vendeve anëtare të BE-së për të pranuar një vend të ri që vjen nga një shtet anëtar”, kishte theksuar ai.

Ai citoi Spanjën, që përballet me kërkesat separatiste, që refuzoi të njohë edhe Kosovën. “Në një farë mënyre është një situatë e ngjashme, pasi bëhet fjalë për një vend të ri”, shtoi Barroso.

Një keqkuptim që skocezët që kërkojnë pavarësi e kritikuan pasi referendumi i tyre është pranuar dhe njihet nga Londra, në dallim nga pavarësia e Kosovës që nuk njihet dhe kontestohet nga Serbia.

“Parashtrimi i një sërë ndërlikimesh institucionale për Brukselin ka ndikuar që disa drejtues të bëjnë deklarata politike habitëse”, thekson Nicola McEwen, profesoreshë e Qendrës Skoceze të Ndryshimit Kushtetues.

“Është me të vërtetë një situatë e vështirë për Bashkimin Evropian”, deklaron gjithashtu Pablo Calderon Martinez, i ngarkuar me Studimet Evropiane në ”King’s College” në Londër.

BE-ja që po përballet tashme me një ekonomi në rënie dhe një papunësi në rritje, kryesisht tek të rinjtë, do të largohej nga diskutimet e forta mbi mënyrën sesi do të trajtohet një Skoci e pavarur dhe shumë proevropiane. Mbi të gjitha që në lindje, sjellja e Rusisë në Ukrainë shqetëson vendet balltike me minoritet të lartë rusofon që mund të kërkojnë më shumë autonomi.

“Askush nuk dëshiron të merret me këtë problem ndërkohë që ka një krizë në Ukrainë, në Lindjen e Mesme, në Irak”, thekson Montserrat Guibernau, profesoreshë në Shkencat Politike në ”Queen Mary University” në Londër.

“Një gjë është e sigurt, një shtet i ri i pavarur, do të bëhet për shkak të pavarësisë së tij, një shtet i jashtëm me Bashkimin Evropian”, garantoi në vitin 2013 presidenti i Këshillit Evropian, Herman Van Rompuy, i pyetur në atë kohë mbi çështjen e Katalonjës.

“Pra këtij shteti të ri do t’i duhet të kërkojë aderimin në BE, sipas procedurave për të hyrë që ekzistojnë, gjë që mund të zgjasë deri në vitin 2020. Në të gjitha rastet, kjo kërkesë do t’i nënshtrohet ratifikimit të të gjitha vendeve anëtare”, sipas ekspertëve.

Katalonjasit, që manifestuan në masë për pavarësi javën e kaluar në Barcelonë, por gjithashtu edhe baskët, e ndjekin me vëmendje referendumin, ndërkohë që Madridi refuzon të marrë parasysh pavarësinë e këtyre rajoneve.

“Spanjollët dhe me shumë mundësi edhe francezët gjithashtu, do të bëjnë gjithçka që munden për të mbytur ekzistencën e Skocisë brenda BE-së me qëllim dekurajimin e Katalonjës”, vlerësoi Calderon Martinez.

Madje edhe ministri gjerman i Punëve të Jashtme, Frank Walter Steinmeier, deklaroi javën e kaluar se “preferon të imagjinojë që Britania e Madhe mbetet e bashkuar”.

ee“Nuk mund të imagjinoj një skenar në të cilin Skocia të jetë i vetmi vend evropian që përjashtohet”, thekson McEwen. Skocezët që kërkojnë pavarësi shpresojnë të marrin ndonjë modifikim të traktateve, që do t’i mundësojë të rrijnë në BE edhe pas shpalljes zyrtare të pavarësisë, që parashikohet në vitin 2016.

Disa ekspertë citojnë shembullin e Gjermanisë Lindore pas bashkimit, duke gjykuar se pas bisedimesh fillimisht të vështira, u arrit marrëveshja për një aderim në dy ose tre vite.

Për McEwen, Brukseli ka interes të dalë kryelartë.

“Kjo mund të shndërrohet në një subjekt krenarie për BE-në, pasi jo gjithmonë mosmarrëveshjet territoriale zgjidhen në këtë mënyrë”, thekson McEwen”.

HermesNews - ©2014

Dërgo me email | Stampo artikullin