05/08/2014 19:48:57

Inflacioni gjatë këtij viti do të luhatet nga 0.9% deri 3.6%

Norma e inflacionit në gjashtëmujorin e parë ka rezultuar e ulët dhe nën objektiv. Inflacioni mesatar rezultoi 1.6% në tremujorin e dytë të vitit 2014, duke shënuar rënie krahasuar me vlerën e regjistruar një tremujor më parë

TIRANE - Presionet e dobëta inflacioniste prezente në ekonominë shqiptare pritet të dominojnë edhe në të ardhmen e afërt. Sipas buletinit zyrtar të Bankës Qendrore, gjatë këtij viti inflacionit pritet të luhatet brenda intervalit 0.9% - 3.6%.

Ekspertët e fushës mendojnë se, duke marrë në konsideratë forcën vepruese të mekanizmit të transmetimit të politikës monetare dhe stabilitetit financiar, Banka e Shqipërisë do të mbetet në kah stimulues gjatë periudhës afatmesme, duke siguruar rikthimin e inflacionit pranë objektivit të BSH-së.

Sipas BSH-së, norma e inflacionit në gjashtëmujorin e parë ka rezultuar e ulët dhe nën objektiv. Inflacioni mesatar rezultoi 1.6% në tremujorin e dytë të vitit 2014, duke shënuar rënie krahasuar me vlerën e regjistruar një tremujor më parë. Ndërsa inflacioni vjetor zbriti në nivelin 1.5% në muajin qershor.

Ecuria e inflacionit vijon të përcaktohet prej dinamikës së çmimeve të produkteve ushqimore të papërpunuara, ndërsa grupet e tjera të shportës kanë patur një kontribut të vogël në inflacion. Në aspektin makroekonomik, vlera e ulët e inflacionit ka reflektuar shfrytëzimin jo të plotë të kapaciteteve prodhuese, normat e ulëta të inflacionit në vendet partnere, dhe pritjet afatshkurtra në rënie për inflacionin.

HermesNews - ©2014

Dërgo me email | Stampo artikullin