17/07/2014 17:22:27

A JEMI TË SIGURT ?

Intervistë me Komisar Arben Beqirin, Shef i seksionit të krimeve në Shkodër. A do të mjaftojnë fushatat në terren për të pastruar kanabisin ? Cilat janë kostot operacionale ? Cili është bashkëpunimi me pushtetin lokal, dhe mbi të gjitha a jemi të sigurt ?

HermesNews - Fushata në terren antikanabis është e lidhur me një sërë strategjish, pa të cilat nuk duket se mund të funksionojë. Paralelisht me korrjen e bimës së gjelbër, lufta antikorrupsion në radhët e efektivave blu, fushata sensibilizuese në shkolla dhe bashkëpunimi handikap me kryetarët e komunave, do ta bëjë këtë verë mesa duket më të gjatë se zakonisht. Shefi i seksionit të krimeve në Drejtorinë e Policisë së Qarkut Shkodër, Komisar Arben Beqiri, babai i tre fëmijëve, në këtë post që nga nëntori i vitit 2013, flet, ndër të tjera, për punën e bërë gjatë fushatës antikanabis, peripecitë e bashkëpunimit me krerët lokal të cilët janë thuajse inekzistent dhe strategjitë e parandalimit të drogës në shkolla.

Sa mund të flasim për shtesa në kostot operacionale antikanabis në veri ?

Gjithmonë llogaritet një kosto (operacionale), duke u bazuar në situatën aktuale dhe duke marrë për bazë operacionet e kryesuara vitet e kaluara. Drejtoria e Përgjithshme ka planifikuar automjete shtetë, vetëm për këtë fushatë antikanabis, plus dhe karburant shtesë, rreth 4000 Litër karburant në muaj plus asaj që jepet normalisht i cili përdoret vetëm për këtë fushatë antikanabis. Por kjo (llogaritje) është në varësi të operacioneve sepse varet nga dinamika që ka në terren. Ne opererojmë dhe me 10 - 15 automjete të (drejtorisë së përgjithshme të policisë) për një ditë, në rrethin e Malësisë së Madhe dhe Pukës.

Ka shtesa në radhët e efektivave të policisë, nga rrethe të tjera ?

Ne operojmë me efektivat që kanë tre komisariatet e policisë vendore, efektivat e policisë së qarkut. Në një pjesë të madhe të operacioneve kanë marrë pjesë dhe efektivat e komisariatit të policisë së shkodrës në bashkëpunim me efektivat tonë, plus është koordinuar dhe me drejtorinë r rajonale të policisë kufitare kryesisht në automjete transporti. Për vetë speficikën që ka terreni i qarkut kërkohen automjete të mira të kalueshmërisë së lartë, (fuoristrada). Në dispozicion të efektivave të policisë janë vënë dhe tre mjete lundruese me të cilat operohet në zonat ku kalimi në rrugë tokësore bëhet me rrugë ujore. Kështu kursejmë kohën dhe lodhjen fizike të efektivave.

… di që në disa raste ju kanë kundërshtuar dhe me armë…

Vjet kanë kundërshtuar me armë, në Shosh, (Shtator), ndërsa sivjet jo. Nuk ka patur raste, por masat janë marrë të gjithanshme. Përveç planeve kryesore, kemi patur dhe planin e të papriturave për çdo rast.

Mendoni se aksionet antikanabis në terren mjaftojnë ?

Mendoj se kjo nuk është vetëm një luftë e jona. Duhen shumë aktorë që të na mbështesin dhe që kanë detyrimin ligjor, që të japin kontributin e tyre në këtë luftë. Ka dy prioritete në punën tonë, operacionet antikanabis dhe garatimi i rendit dhe qetësisë për sezonin turistik veror. Siç thashë dhe më sipër, të gjitha grupet e interesit duhet të japin ndihmesën, si punë parandaluese si psh, strukturat e pushtetit lokal që kanë detyrimin ligjor me ndërgjegjësimi i njerëzve. Aktor tjetër është arsimi. Aktivitete sensibilizuese nëpër shkolla që flasin për konsumin e drogës në shkolla. Është problem. Strategji dhe për punën parandaluese të dhunës në familje dhe mbrojtjes së të miturve.

Prindërit ankohen shpesh për konsumin e drogës në shkolla, sidomos cigareve me hashash… por gjithashtu unë kam dëshmi që thonë se në shkollën “Ndre Mjeda” ka raste të shpeshta ku të rinj, përdorin drogë në oborrin pas shkollës. Nuk janë nxënës shkolle, por të jashtëm. Prindërit thonë se polici i lagjes nuk ka reaguar kur i kanë thënë…

Objekt kryesor i punës sonë është evidentimi i konsumuesve të lëndës narkotike por më i rëndësishëm për ne është burimi se ku vjen, blihet kanabisi.

Sa është sasia që të inkriminon ?

Duhet të jetë diku deri ne 2 gr (drogë kanabis).

Çfarë mund të na thoni në lidhje me këta konsumatorë të brendshëm të shkollave dhe parqeve ku shpesh herë janë evidente ?

Ekzistojnë konsumatorët dhe bandat kriminale që janë struktura të vogla. Konsumatorët janë adoleshentë që e fillojnë me kanabisin derisa kalojnë tek heroina.

Po vihem në pozicionin e prindërve. Shoh një konsumator të drogës në shkollë, çfarë duhet të bëj ?

Absolutisht do të bëni gjënë e duhur, telefonon në 129 ose 126.

Kalojmë tek fushata antikanabis. Si është planifikuar ?

Fushata antkanabis është e ndarë në dy faza; faza sensibilizuese e cila nënkupton sensibilizimin e opinionit dhe komunitetit dhe parandaluese. Për parandalimin e kultivimit, ne planifikojmë dhe takime në të gjitha nivelet e qeverisjes vendore dhe komunat me pjesëmarrjen e administratës, komunitetit, kryetarët e njësisë bazë të qeverisjes vendore dhe përfaqësues të shkollave dhe të komunitetit. Përgjithësisht ka qenë i mirë bashkepunimi, por realisht kemi pretendime më të mëdha. Komunat duhet të marrin përsipër detyrimet e veta ligjore, 7975 ligji, dt 26.7 1995 ndryshuar me 9559 8.6.2006 neni 10/1 “kryetari i njësisë bazë të qeverisjes vendore, që është kryeplaku, për çdo rast janë të detyruar të raportojnë me shkrim”.

A mund të na jepni ndonjë detaj me këtë ?

Bashkëpunim i mirë ka qenë me komunn Temal, i shkëlqyer do thoja, për të gjithë të tjerët kemi rezeva. Shfaqin shenja indiferentizmi.

A keni marrë kënd në pergjegjësi penale (përjashto arrestimin e sotëm)?

Vetëm një rast, është marrë në përgjegjësi penale (fshati Pentar, komuna Dajç), është marrë nën përgjegjësi penale kryetari. Por nuk është vetëm kjo. Problem për fushatën antikanabis është mbi të gjitha problemi i pronave në Shqipëri. Titujt e pronësisë kanë qenë dhe janë problem për ne.//HermesNews ©2014//

Doriana Metollari

Dërgo me email | Stampo artikullin