25/06/2014 17:48:07

BE nuk ka fonde: sytë nga investimet e huaja

Dy çështjet kryesore të statusit të kandidatit: fondet dhe aderimi. Për asnjërën prej tyre nuk ka një mesazh të qartë nga Bashkimi Europian. Qeveria hedh sytë nga investimet e huaja

TIRANE - Statusi i vendit kandidat për shqipërinë është një mesazh politik tepër i fuqishëm për vendet që tregon se Shqipëria po ecën në rrugën e duhur, por kjo nuk do të thotë se Bashkimi Europian do të hapë portofolin për ne.

"Nuk ka një lidhje të drejtpërdrejtë ekonomike", sqaron ministrja e integrimit Klajda Gjosha, por Shqipëria vazhdon të marrë dhe të përfitojë fondet e paraaderimit, por nëse shqiptarët kanë kujtuar se fondet pas statusit do të rriten, duhet ta mendojnë dhe një herë.

"Shifrat janë në lëvizje", thotë ministrja e re me diplomaci. Fjala e ditës në kohë krizë, "ne nuk mund të presim një rritje të mirëfilltë të fondeve, por ajo çka do të thotë për ne statusi i vendit kandidat është një mesazh i mirë që u jepet edhe vendeve anëtare për besueshmërinë që po krijon çdo ditë Shqipëria dhe Qeveria shqiptare për të sjellë sa më shumë investime të huaja, të cilat ne shpresojmë jo vetëm do të zhvillojnë vendin, por do të rrisin edhe vendet e punës për qytetarët shqiptarë".

Mesa duket Bashkimit Europian ka qenë i qartë në atë çfarë ka kërkuar nga Shqipëria dhe në atë se çfarë mund të japë pas statusit. Qeveria shqiptare tani është e qartë dhe jep asnjë të dhënë rreth datës, "nuk mund të vendosim data në proçes. Është proçesi më i vështirë dhe më kompleks që mund të ekzistojë ndonjëherë", tha Gjosha.

E përditshmja ekonomike Il Sole 24 ore citonte sot burime pranë Bashkimit Europian, të cilat pohonin se aderimi i vendit tonë mund të bëhet rreth vitit 2024. Gazeta nuk citonte asnjë emër.


Promo

Doriana Metollari

Dërgo me email | Stampo artikullin