25/06/2014 08:26:49

Nuk kemi arritur aty ku duhet

''Lazarati tregoi se ne mundemi, por jo se kemi arritur aty ku duam të arrijmë''

TIRANË - Kryeministri Edi Rama mori pjesë sot në mbrëmje në një ceremoni të organizuar në Pallatin e Brigadave në respekt të forcave të policisë që u angazhuan në operacionin kundër kultivimit të lëndëve narkotike në Lazarat.
Kryeministri i shoqëruar nga ministri i Brendshëm, Saimir Tahiri dhe zëvendësministrja, Elona Gjebrea ka përshëndetur dhe ka takuar një nga një efektivët e policisë. Më pas është ekzekutuar Himni Kombëtar dhe është transmetuar një material filmik i operacionit në Lazarat. Kryeminsitri Rama i cilësoi forcat e policisë si protagonistë të një historie të re të Polcisë së Shtetit. Ai i falenderoi ata për punën jashtëzakonisht të vështirë që bëjnë. Rama është shprehur se nuk kishte rast më të mire se kjo e sotmja për ta çelur rrugën e ceremonive të Pallatit të Brigadave për njerëz që arrijnë të bëjnë gjëra të jashtëzakonshme. "Ajo që bëtë dhe bëni në Lazarat është e jashtëzakonshme. Më vjen keq që kolegë dhe kolege tuaj nuk mundën të jenë sot sepse u duhet të vazhdojnë të jenë në Lazarat. I falenderoj në emër të qeverisë dhe të gjithë shqiptarëve", tha Kryeministri Rama.

Duke folur për të ardhmen e Policisë së Shtetit, Kryeministri Rama u shpreh se, "nuk duhet ta kthejmë Lazaratin në një kurorë dafinash dhe më pas t’ia marrim gjumit. Lazarati tregoi se ne mundemi, por jo se kemi arritur aty ku duam të arrijmë".

Për luftën kundër kriminalitetit foli pastaj dhe ministri Saimir Tahiri; "kemi sfidën e madhe të çojmë përpara luftën e shpallur kundër kriminalitetit, edhe me ata që janë lart".


Promo

HermesNews - ©2014

Dërgo me email | Stampo artikullin