09/06/2014 20:39:17

Një zyrë kundër korrupsionit

Ky projektligj synon një reformim rrënjësor të strukturës aktuale të Shërbimit të Kontrollit të Brendshëm

TIRANË - Ministri i Punëve të Brendshme Saimir Tahiri prezantoi në Komisionin për Çështjet Ligjore, Administratën Publike dhe të Drejtat e Njeriut projektligjin “Për Shërbimin për Ankesat dhe Çështjet e Brendshme në Ministrinë e Punëve të Brendshme”.

Sipas Tahirit ky projektligj synon një reformim rrënjësor të strukturës aktuale të Shërbimit të Kontrollit të Brendshëm, e cila do të jetë Shërbimi për Ankesat dhe Çështjet e Brendshme.

“Ky p/ligj është një reformë tërësore e ish-SHKB-së, nisur nga vetëdija jonë se ky instrument, është një instrument i fuqishëm për të garantuar ligjshmërinë e punës së punonjësve të Policisë së Shtetit edhe njëkohësisht garantimin e të drejtave dhe lirive themelore të njeriut.”, tha ai.

Sipas Tahirit, efektiviteti në luftën kundër krimit të organizuar dhe mbi të gjitha kundër korrupsionit, varet më së pari nga garantimi i distancës klinike të punonjësve të Policisë së Shtetit nga praktikat korruptive apo nga lidhjet me botën e krimit.

“Në këtë kuadër, shtoi ai Shërbimi për Ankesat dhe Çështjet e Brendshme është një mekanizëm i cili do të kontribuojë fuqishëm në mbajtjen dhe ruajtjen e standardeve të punës në Policinë e Shtetit dhe jo vetëm.

E dyta, ne besojmë që ky shërbim, duhet, më së pari të jetë demokratik, apolitik në fuksionim, duhet t’u përgjigjet interesave dhe të mos kthehet në një mekanizëm për t’u keqpërdorur në dorën e cilitdo epror.

Nuk janë të pakta praktikat kur ish-SHKB-ja është keqpërdorur nga eprorët, si kamzhik, shpeshherë dhe politik.”, theksoi Ministri i Brendshëm.

“Deri më sot, nga momenti që qeveria ka filluar detyrën janë referuar në Prokurori 154 kallëzime penale për 211 punonjës policie, ndër të cilët, një punonjës policie i nivelit të lartë drejtues, 6 punonjës policie të nivelit të mesëm drejtues, 70 punonjës policie të nivelit të parë drejtues, 113 punonjës të nivelit zbatues, 21 punonjës civilë dhe 14 shtetas, të cilët kanë qenë të lidhur me referimet që ka bërë SHKB-ja në Prokurori.”, tha Ministri i Brendshwm.

“Me ligjin e ri, Shërbimi për Ankesat dhe Çeshtjet e Brendshme, vendos në qendër të veprimtarisë ankesat e qytetarit për të garantuar ligjshmërinë në punën e Policisë së Shtetit, transparencën dhe mbi të gjitha llogaridhënien e punonjësve të Policisë së Shtetit ndaj qytetarëve, si dhe shmangien maksimale të shkeljes së drejtave dhe lirive themelore të njeriut.

Ky ligj, tha Tahiri, synon sigurisht rritjen e besimit të publikut te Policia e Shtetit, duke ndërtuar këtë mekanizëm kontrolli mbi Policinë, që është mbi të gjitha i besueshëm dhe i paanshëm dhe që heton ankesat e publikut në mënyrë të drejtë dhe objektive. Ligji parashikon mbikëqyrje të jashtme mbi policinë, gjë që do të thotë funksionim demokratik më së pari i vetë Shërbimit, i orientuar nga qytetarët”.

Ai sqaroi gjithashtu se me ligjin e ri, nduk do të jenë punonjësit e policisë që do kontrollojnë punonjësit e policisë. “Deri më sot, në ish-SHKB-në, punonin kryesisht punonjës policie, të cilët e kishin fatin dhe karrierën të lidhur domosdoshmërisht me karrierën policore. Do të thotë që mund të dilnin nga radhët e Policisë së Shtetit, të punonin në ish-SHKB-në dhe më pas të ripunësoheshin Policinë e Shtetit. Kjo, sqaron Tahiri, cënonte paanësinë, në vlerësimin tonë, ka cënuar kapacitetin për të përmbushur detyrën ashtu siç duhet dhe ka krijuar premisa të mira për të krijuar lidhje të shkurtra ndërmjet punonjësve të SHKB-së dhe Policisë së Shtetit. Ky ligj parashikon që në harkun kohor të dy viteve, SHKB-ja të reformohet tërësisht nga pikëpamja e burimeve njerëzore, duke parashikuar që në përfundim të reformës, të mos ketë më asnjë lidhje ndërmjet karrierës në Policinë e Shtetit dhe karrierës në SHKB, duke parashikuar këtë mekanizëm të jashtëm për kontrollin mbi Policinë e Shtetit.”, përfundoi Tahiri./a.g/

HermesNews - ©2014

Dërgo me email | Stampo artikullin