04/06/2014 15:25:27

Rama fton opozitën pas raportit

Maxhoranca dhe opozita të bëhen bashkë për axhendën kombëtare të integrimit në BE

TIRANE - Kryeministri Edi Rama tha të mërkurën se jemi të vendosur që çdo refomë, çdo ligj, çdo hap ta diskutojmë me opozitën.

Në konferencën e përbashkët në Tiranë, me Komisionerin për Zgjerim në Bashkimin Europian Stefan Fyle, Kryeministri Rama tha se ne do të bëjmë çmos që t’i ofrojmë opozitës gjithçka mundemi që të përfshihet, të jetë pjesë, por, tha ai ne do të udhëheqim.

“Jemi të vendosur që çdo refomë, çdo ligj, çdo hap ta diskutojmë me opozitën. Por ne kemi fituar zgjedhjet, opozita i ka humbur zgjedhjet dhe mandatin për të çuar vendin përpara e kemi ne. Ne do të dëgjojmë, por ne do të udhëheqim, sepse nuk mund tu justifikohemi të tjerëve dhe për më tepër komisionit, duke qënë se do bëjë raporte të tjera, duke i thënë se e ka fajin opozita”, deklaroi kreu i qeverisë.

Kryeministri theksoi rëndësinë që maxhoranca dhe opozita të bëhen bashkë për axhendën kombëtare të integrimit në BE.

“Le të bëhemi bashkë për të patur një vijë të qartë ndarëse mes kampeve politike dhe kampeve në parlament dhe kampit tonë të përbashkët, të qytetarëve dhe përfaqësuesve të qytetarëve të këtij vendi dhe kampit të trafiqeve e korrupsionit. Të bëhemi bashkë për të ndarë axhendat partiake me axhendën tonë kombëtare, që pikë të parë të vetën ka Shqipërinë europiane, Shqipërinë në BE”, deklaroi kryeministri Rama.

Sipas Ramës, ky raport për mua, lexohet, më shumë përgjegjësi dhe më shumë punë për qeverinë, më shumë realizëm dhe më shumë përgjegjshmëri për opozitën. “Opozita duhet të zbresë sa më shpejt në tokë sepse siç e shihni raporti i bërë nga një palë e tretë, se është njohur se punonte fakte dhe jo me thashetheme, punon me kritere objektive dhe jo me subjektivizëm flet qartë për një medalje që ka dy anë komplet të kundërta, a qoftë për luftën kundër korrupsionit, luftës kundër drogës, krimit të organizuar”, tha Rama.

I pyetur nga media se në rast se refuzohet dhënia e statusit, cila është përgjegjësia juaj, Kryeministri Rama u shpreh se unë mendoj se ne në këtë rast e kemi brë detyrën tonë. “Vendimi për Shqipërinë shpresojmë, urojmë dhe po punojmë që t’i jepet bazuar mbi raportin e komisionit. Vendet anëtare kanë kërkuar një raport nga komisioni për të konfirmuar bilancin. Raporti ja ku është. Por sigurisht vendet anëtare kanë edhe arsye të tjera që janë aryset e tyre dhe që nuk kanë lidhje me Shqipërinë. Kështu që unë kam nderin dhe privilegjin të jem kryeminsitri i Shqipërisë dhe përgjigjem për punën që bën qeveria e Shqipërisë para shqiptarëve. Unë nuk përgjigjem për dhimbjet e barkut që ka dikush tjetër diku tjetër”, tha Kryeministri.

Sa i takon qëndrimit të skeptikëve, Rama u shpreh se ne e marrim këtë moment si momentin kur rritet pesha e përgjegjësive sepse rruga e integrimit shkon duke u bërë më e vështirë. “Ne ja dolëm të bëjmë punën tonë. Më lejonë që këtë moment të rezervojmë kohën që kemi në dispozicion për ata që siç e theksoi komisionieri Fyle na mbështetën hapur, vende mike, vende partnere, vende që pa asnjë ngurim e duan Shqipërinë me statusin e vendit kandidat. Ditët në vijim do kemi kohë edhe për skeptikët”, theksoi Kryeministri.

Shefi i qeverisë shqiptare e ka vënë theksin tek vlerësimet që raporti i progresit bën për nismat në luftën kundër pastrimit të parave, krimit të organizuar dhe kontrolleve kufitare. Ai i ka bërë thirrje opozitës që të mos politizojë luftën kundër krimit dhe dukurive të tjera negative, duke e ftuar atë që të bashkëpunojë në këtë drejtim. “Politizimi i luftës ndaj krimit nuk i shërben askujt veç krimit. Edhe politizimi i luftës kundër drogës nuk i shërben askujt veç trafikantëve. Prandaj le të bëhemi bashkë në këtë luftë”, shtoi Rama.

HermesNews - ©2014

Dërgo me email | Stampo artikullin