26/05/2014 08:20:36

Ditë të këqija për integrimin e Shqipërisë

Rama: ''Europa mes të ardhmes e të shkuarës si asnjëherë tjetër.Shembulli i Renzit tregon se ka veç një rrugë kundër ekstremistëve: Ballë për ballë !''

TIRANË - Partia Popullore Europiane ka fituar mazhorancën relative në Parlamentin Europian me 211 eurodeputetë ndërsa Partia Socialiste Europiane ka 193 vende. Grupi i tretë në parlamentin europian mund të dalë ai i liberaldemokratëve me 74 deputetë. Të gjelbërit duket se do të jenë forca e katërt me 58 vende përpara të Majtës së Bashkuar me 47 dhe konservatorëve të Ecr me 39 eurodeputetë.

Grupi i euroskeptikëve pra UKIP dhe Lega Nord do të ketë 33 deputetë, natyrisht pa frontin nationale të Mari Le Penit që është regjistruar te grupi i pavarur që pritet të marrë 40 deputetë.

Ndërkaq një numër prej 56 deputetëve do ta përbëjnë forcat e reja që nuk kanë qenë të pranishme në legjislaturën e kaluar si Lëvizja 5 yje e Bepe Grillo-s në Itali, liberalët e Ano, euroskeptikët gjermanë të Afd apo dhe ekstremistët e Agimit të Artë.

Euroskeptikët në Francë arritën të dalin forcë e parë, Në Britaninë e Madhe kanë marrë rezultat të rëndësishëm Ukip që kërkon daljen e Britanisë së Madhe nga BE. Rezultate të qarta kanë marrë forcat euroskeptike në Austri, Gjermani, Itali etj.

Në Itali, sipas të dhënave paraprake Partia Demokratike e Kryeministrit Matteo Renzi është në krye e shkëputur nga Levizja 5 yje e Bepe Grillo-s, gati me 20 pikë diferencë.

Kandidati i PSE për President i Komisionit Europian Martin Schulz deklaroi se është gati të hyjë në tratativa me PPE-në për të krijuar një mazhorancë absolute dhe një koalicion të madh në Parlamentin Europian.

HermesNews - ©2014

Dërgo me email | Stampo artikullin