24/05/2014 18:53:09

Grevistët, po na trajtojnë si qentë

Tre deputetë të PD-së vizitojnë grevistët. Greva nuk është e jona

TIRANE - Tre grevistë janë transportuar për në spital për të marrë ndihmë mjekësore. Bëhet fjalë për Petrit Fejzullahi ish-financier në ISKSH, Mehmet Cemurati ish-gardist dhe Ludovik Berisha ish-inspektor zjarrëfikëse në Berat që u detyruan të largohen nga çadra. Autoriteti shëndetësor rajonal shkruan në një komunikatë se, "Në shërbim të grevës kemi lënë në dispozicion një autoambulancë 24/24 orë me të gjithë personelin mjekësor". Të tre grevistët janë rikthyer sërish në çadra për të vazhduar grevën e urisë. Kryetarja e Shoqatës së të larguarve nga administrata, Nertila Qafzezi tha se grevistët nuk marrin ndihmën e duhur mjekësore në spital. "Po na trajtojnë si qentë", tha ajo. Grevistët u vizituan paraditen e sotme nga tre deputetë të Partisë Demokratike Albana Vokshi, Jozefina Topalli dhe Mesila Doda. Deputetja e Partisë Demokratike Mesila Doda, e cila ka vizituar paraditen e sotme grevistët në çadrat e tyre, ka theksuar se greva nuk është e Partisë Demokratike por është një nismë e gjithësecilit. Grevistët janë vizituar dhe nga deputetë të tjerë të PDsë.

HermesNews - ©2014

Dërgo me email | Stampo artikullin