23/05/2014 16:13:46

Krijohet ''Nucleus Albania''

Ndërmarrjet e vogla dhe të mesme, tha Ministri, duhet të kthehen në gjeneratorët e punësimit dhe të zhvillimit ekonomik

TIRANE - Ministri i zhvillimit ekonomik, tregtisë dhe sipërmarrjes, Arben Ahmetaj dhe Ambasadori i Gjermanisë në Tiranë, Hellmut Hooffman, nënshkruan krijmin e Nucleus Albania, një organizatë jo qeveritare ku marrin pjesë shoqata të ndryshme biznesi, në funksion të zhvillimit të mëtejshëm të sektorit të Ndërmarrjeve të Vogla dhe të Mesme.

Kjo iniciativë mbështetet në metodën “Bërthama”, e përdorur gjerësisht në Gjermani. “Nucleus Albania” do të mbështetet në dy vitet e para nga GIZ dhe objektiv kryesor për vitin e parë ka mbledhjen rreth vetes të 350 ndërmarrjeve të vogla dhe të mesme.

Në fjalën e tij, ministri Ahmetaj tha se “Nucleus”, ky bashkim, ka mundësi të jetë inovacion në mënyrën e të menduarit dhe të menaxhimit të ndërmarrjeve të vogla dhe të mesme. Ndërmarrjet e vogla dhe të mesme, tha Ministri, duhet të kthehen në gjeneratorët e punësimit dhe të zhvillimit ekonomik.

“Dua të veçoj këtë iniciativë si një iniciativë që merr të gjitha idetë, merr të gjitha inovacionet dhe tenton t‘i ngrejë në një nivel të ri menaxhimi dhe zhvillimi të strukrurës ndërmarrjet e vogla dhe të mesme”, u shpreh Ministri.

Marrëveshja fillimisht u nënshkrua nga Ministri Ahmetaj dhe ambasadori Hoffman, ndërsa më pas nga krerët e shoqatave të biznesit që marrin pjesënë “Nucleus Albania”, si Biznes Albania, KASH, etj.

Modeli “ Nucleus,“ nëpërmjet organizimit të grupeve të sipërmarrësve nga të njëjtët sektorë, me anë të koordinimit nga një këshilltar, me qëllim përmirësimin e biznesit të tyre të përbashkët, ka prodhuar efekte mjaft të mira. Kjo pasi kjo mënyrë specifike organizimi i ndihmon sipërmarrësit e sektorëve të ndryshëm për të maksimizuar avantazhet e tyre të krahasuara dhe për të rritur kapacitetin e tyre për inovacion e progres.

HermesNews - ©2014

Dërgo me email | Stampo artikullin