20/05/2014 19:16:05

Digjet droga

Asgjësohen 1780 kg drogë: Tahiri kemi strategji për trafikun

TIRANE - 1780 kg kanabis sativa janë asgjësuar mesditën e sotme nga policia, buzë lumit Erzen në periferi të Tiranës. Për Ministrin e Brendshëm, Saimir Tahiri, kjo është një luftë për të cilën policia ka mbështetjen e ndërkombëtarëve. Madje ai foli dhe për një plan strategjik të hartuar me partnerët ndërkombëtarë. Tahiri tha se policia ka në kontroll gjithë territorin vetëm se lufta kundër lëndëve narkotike nuk është e lehtë. Nga ana e tij zv/ambasadori i BE-së, Clive Rumbold, u shpreh se ufta ndaj narkotrafikut është një sfidë për Shqipërinë dhe faktor kyç për integrimin e saj në BE. Ndërsa sa i takon çështjes së avionit në Divjakë tha se ajo nuk duhet politizuar, por duhet të ketë një hetim të gjerë. I pyetur a do të nisin procedime për drejtuesit vendorë që nuk japin informacion për parcelat e drogës, Tahiri tha se "jemi në fazën e reformimit të sistemit dhe mekanizmave sanksionues lidhur me kultivimin e trafikimin e lëndëve narkotike. Kemi një plan veprimi strategjik në luftën kundër trafikut të drogës", tha ai. Tahiri u shpreh se Policia ka kontroll mbi territorin por lufta kundër lëndëve narkotike nuk është e lehtë, presioni financiar dhe kriminal është i madh, por ne do të bëjmë më të mirën. "Lufta kundër trafikut të drogës është një sfidë për Shqipërinë. Do jetë dhe një faktor kyç edhe për BE dhe gjitha shtetet anëtare, që do ndikojë edhe në vendimin e muajit qershor. Rasti i Divjakës nuk duhet politizuar, duhet një hetim më i gjerë", tha përfaqësuesi i BEsë në Tiranë Clive Rumbold.

HermesNews - ©2014

Dërgo me email | Stampo artikullin