13/05/2014 14:05:50

Bankat lehtësojnë kreditimin

Kërkesa për të marrë kredi është nxitur jo vetëm nga nevoja e familjarëve për të financuar konsumin dhe banesën, por edhe nga kushtet e kreditimit të aplikuara nga banka

TIRANE - Banka e Shqipërisë vëren se, në tremujorin e parë të vitit 2014, bankat shprehen për lehtësim të standarteve të kreditimit për kredinë e dhënë për individë, ndonëse në një masë më të vogël krahasuar me tremujorin e kaluar.

Përqindja neto e bankave që shprehen për lehtësim të standardeve rezultoi +3.1%, rreth 7.7 p.p më pak së në fund të vitit 2014. Sipas qëllimit të përdorimit të kredisë, lehtësimi i kredisë u ndje për kredinë konsumatore, ndërkohë që standardet e kredive me qëllim financimin e blerjes së banesës u shtrënguan në tremujorin në analizë.

Kërkesa e individëve për kredi u vlerësua me një rritje të lehtë nga bankat, në tremujorin e parë të vitit 2014, bën të ditur BSH-ja,. Përqindja neto e bankave që kanë perceptuar rritje të kërkesës së individëve është +0.5 %, në ngadalësim më atë të rezultuar në tremujorin e kaluar +3.7%.

Bankat presin rritje të kërkesës në tremujorin e dytë të vitit 2014. Sipas qëllimit të përdorimit të kredisë, bankat raportojnë kërkesë në rritje për kredinë konsumatore, për të katërtin tremujor rresht, por kërkesë në rënie për kredinë për blerje banese.

Kërkesa për të marrë kredi është nxitur jo vetëm nga nevoja e familjarëve për të financuar konsumin dhe banesën, por edhe nga kushtet e kreditimit të aplikuara nga banka dhe vendimet e Bankës së Shqipërisë. Gjithashtu, zhvillimet pozitive në tregun e pasurive të paluajtshme janë raportuar të kenë dhënë kontribut të ulët por pozitiv në kërkesë. Besimi konsumator dha një kontribut të ulët por negativ në kërkesën e konsumatorëve për të marrë një kredi.

HermesNews - ©2014

Dërgo me email | Stampo artikullin