10/05/2014 18:51:30

Avioni i rrëzuar; prova për drogë pak metra larg

Në pranga një italian dhe një shqiptar

TIRANË - Ministri i Brendshëm Saimir Tahiri reagoi sot lidhur me avionin e rrëzuar mesditën e sotme në zonën e Divjakës.

Në një deklaratë për mediat nga Ministria e Brendshme, Tahiri sqaroi se “sot në ora 14:40 një avion i vogël ka bërë ulje në plazhin e Divjakës, ku edhe është dëmtuar duke thyer njërën nga rrotat dhe elikën. Policia e Shtetit ka ndaluar pilotin, i cili është shtetasi italian Giorgio Riformato”. Ai bëri të ditur se nga hetimet paraprake rezulton që avioni është nisur nga Rinasi në orën 13:26 me leje Nr. 193, lëshuar nga Aviacioni Civil, dhe me destinacion Italinë.

“Nga të dhënat paraprake, kjo është hera e parë që ky avion ulet në vendin tonë.Avioni është gjetur bosh, ndërkohë që pretendimi i shtetasit Italian është se ka bërë ulje të detyruar për shkak të defektit teknik, gjë që pritet të verifikohet nga hetimet”, tha Tahiri.

Ai sqaroi se paralelisht nga Policia e Shtetit dhe policia kufitare e zonës, së bashku me forcat e Ndërhyrjes së Shpejtë, është bërë rrethimi i zonës, ku dhe është identifikuar një makine tip “Mitsubishi” me targe “AA 794 EU” me një ngarkese drogë të llojit hashash, si dhe disa çanta me lëndë narkotike në afërsi të saj.

“Në vlerësimet paraprake, mendohet të jenë rreth 460 kg kanabis. Sapo jam informuar nga policia se në këto momente është arrestuar drejtuesi i mjetit, Saimir Bajrami, vjeç 35, të cilit i janë sekuestruar dhe 27.000 euro. Nga të dhënat paraprake, ky shtetas ka jetuar në Itali dhe ka mbrritur në Shqipëri vetëm 2 ditë më pare”, deklaroi ministri.

Në vijim të hetimeve, ministri tha se “Policia e Shtetit do ju informojë më shumë për këtë ngjarje, sigurisht edhe nëse avioni dhe fuoristrada e kapur në atë zone janë pjesë e një tentativë për trafik të paligjshëm”.

HermesNews - ©2014

Dërgo me email | Stampo artikullin