30/04/2014 10:55:27

Projekti i ri per TVSH-ne

Skema e re ligjore per tatimin mbi vleren e shtuar

TIRANE - Zëvendësministri i Financave, Ervin Mete deklaroi të mërkurën se projekligji i ri për TVSH-në, që është në fazën e konsultave me grupet e interesit është hartuar bazuar në direktivat e Bashkimit Europian dhe sjell një sërë ndryshimesh në skemën dhe procedurat e kësaj takse.

Në një forum biznesi të organizuar nga Dhoma Amerikane e Tregtisë në Tiranë, Mete theksoi se ky projektligj, do të shfuqizojë ligjin ekzistues për Tatimin mbi Vlerën e Shtuar dhe akteve nënligjore të dala në zbatim të tij, duke nisur nga 1 janari 2015.

Ndërkohë ekspertja e Drejtorisë së Përgjithshme të Tatimeve, Enkelejda Pipa tha se sipas draftit të paraqitur, ulja e TVSH-së së barnave, e cila ka hyrë tashmë në fuqi përmes një udhëzimi të qeverisë, do të përfshihet në ligjin e ri. Furnizimi i barnave, shërbimeve shëndetësore nga institucionet shëndetësore, publike dhe private, është furnizim i përjashtuar nga TVSH.Dhoma amerikane e tregetise (2)Foto Flor Abazaj

Për barnat e importuara dhe të prodhuara në vend, të pajisura me pullën e kontrollit me çmimin me TVSH 10%, me qëllim për t’u tregtuar (shitur) që rezultojnë gjendje në subjektet farmaceutike deri në datën 1 prill 2014, do të aplikohet TVSH-ja në shitje siç rezulton e shënuar në pullë.

Operacionet e përjashtuara sipas këtij ligji janë: shërbimet shëndetësore dhe furnizimet e mallrave dhe shërbimeve të lidhura ngushtë me to, të kryera si nga institucionet shëndetësore publike dhe nga ato private, por këto të fundit duhet të kryejnë shërbimin në kushte sociale të krahasueshme me ato publike që të përfitojnë nga përjashtimi.

Ndërkohë, vijoi Pipa, përjashtohen nga TVSH edhe shërbimet e mjekëve në kuadër të ushtrimit të profesionit të tyre, të licencuar nga autoriteti kompetent shëndetësor, shërbimet e stomatologëve dhe laborantëve dentarë në kuadër të ushtrimit të profesionit, furnizimi i organeve, gjakut, qumështit njerëzor, shërbimet dhe mallrat që kanë të bëjnë me ndihmën sociale, mbrojtjen e fëmijëve, të rinjve, furnizimi i shërbimeve sportive, kulturore kur këto shërbime kryhen nga organizata pa qëllim fitimi dhe me çmime të cilat, nëse nuk janë të aprovuara nga institucionet përkatëse, janë jokonkurruese.

Dhoma amerikane e tregetise (3)Foto Flor AbazajKëtu është vendosur si kriter çmimi nën 50% të çmimeve të tregut siç është aktualisht sipas VKM-së, pra që të rezultojë si masë e marrë për çmime që nuk janë konkurruese me subjektet me TVSH dhe nuk kanë për qëllim fitimin.

Ndërsa në draft parashikohet që arsimi të mbetet i përjashtuar nga Tatimi mbi Vlerën e Shtuar. Sipas relacionit të TVSH, ato që përjashtohen nga kjo taksë janë furnizimet e shërbimeve të mësimdhënies shkollore dhe universitare sipas ligjeve specifike si dhe furnizimi i mësimdhënies shkollore apo universitare nga mësuesit në emër personal.

Me ligjin e ri edhe reklamat që do të publikohen apo do të transmetohen në media do të paguajnë edhe Tatimin mbi Vlerën e Shtuar, Siç përcaktohet në projektligj, reklamat nga media e shkruar ose elektronike nuk janë të përjashtuara nga TVSH.

“Furnizimet e shtypshkronjave, gazetave, revistave dhe librave, përveç reklamës, e kemi mbartur si të përjashtuar, por theksojmë se direktivat europiane nuk e kanë të përjashtuar”, theksoi Pipa.

Ndërkohë, shërbimet financiare në përgjithësi me ndonjë ndryshim të vogël do të mbeten të përjashtuara në përputhje edhe me direktivën; pullat postare, pulla të taksës e të ngjashme; lojërat e fatit, bastet; furnizimi i ndërtesave; tokës, qiradhënia e ndërtesave me disa përjashtime. Furnizimi i kartave të identitetit po ashtu është specifike, pasi Direktiva nuk e ka një parashikim të tillë.

Gjithashtu është hequr përjashtimi për furnizimin e hekurit dhe çimentos ndaj subjekteve ndërtuese të hidrocentraleve, të cilat, në bazë të marrëveshjes respektive, i përdorin si lëndë të parë për ndërtimin e hidrocentraleve. Ndërkohë eshte hequr edhe përjashtimi nga TVSH për furnizimet e shërbimeve të destinuara për realizimin e fazave të kërkimit dhe të zhvillimit të operacioneve hidrokarbure, të kryera nga kontraktorët ose nënkontraktorët që punojnë për realizimin e këtyre fazave, si dhe furnizimi i mallrave që bëjnë kontraktorët për njëri-tjetrin ose nënkontraktorët për kontraktorët e tyre është hequr.

Drafti i ri u shpreh Pipa, eliminon taksimin e dyfishtë të TVSH-së për transaksionet mes bizneseve shqiptare dhe atyre të huaja si dhe lehtëson procedurat për kompanitë.Dhoma amerikane e tregetise (4)Foto Flor Abazaj
Veç qartësimeve teknike drafti tenton, sipas Pipës, të rrisë formalizimin edhe në sektorin bujqësor duke parashikuar pajisjen e cdo fermeri me NIPT të posaçëm çka do të bëjë funksionale skemën e rimbursimit të TVSH-së në bujqësi.

Forumi vijon punimet mbi problematikat themelore mes biznesit dhe administratës tatimore, ecurinë e rimbursimit të TVSH – së dhe marrëdhëniet midis tatimpaguesve dhe zyrave rajonale tatimore. Forumi synon të informojë anëtarët e Dhomës Amerikane me risitë e fundit ligjore që prekin aktivitetin e tyre si dhe për të hapur një debat diskutimesh me ekspertët dhe drejtuesit e tatimeve për cështjet themelore që shqetësojnë biznesin.

Dhoma Amerikane e Tregtisë në Shqipëri është një organizatë private e biznesit e angazhuar për të ndihmuar në përmirësimin e klimës së biznesit në Shqipëri si dhe në përmirësimin e imazhit të biznesit shqiptar në tregjet amerikane dhe ndërkombëtare.

HermesNews - ©2014

Dërgo me email | Stampo artikullin