04/04/2014 15:52:20

Katër denoncime për pronat e Gardës

Zyrtarët kanë kryer shkelje të ligjit për Kthimin dhe Kompensimin e pronës gjatë kohës në të cilën ushtronin funksionet e sipërpërmendura

TIRANË - Agjencia për Kthimin dhe Kompensimin e Pronave dorëzoi sot pranë Prokurorisë së Rrethit Gjyqësor Tiranë Kallëzimin Penal për fillimin e procedimit penal në lidhje me paligjshmërinë e konstatuar në katër Vendimet për kthim prone brenda territorit të Gardës së Republikës.

Vendimet janë miratuar nga zyrtarët e kohës në fund të muajit gusht 2013 me procedura te përshpejtuara.

AKKP kallëzon në Prokurori për kryerjen e veprës penale të shpërdorimit të detyrës parashikuar nga neni 248 i Kodit Penal shtetasit:
- Avenir Peka, Ish Drejtor i Përgjithshëm i AKKP;
- Agim Toro, ish Zv. Drejtor i Përgjithshëm dhe Drejtor Drejtorie;
- Ardian Spahiaj, ish Përgj. Sektori Juridik dhe Kontrollit, AKKP;
- Arben Cenaliaj; ish Përgj. Sektori Shqyrtimit për Qarkun e Tiranës, AKKP,

Zyrtarët e mësipërm, thuhet në njoftimin zyrtar të AKKP-së, rezultojnë të kenë kryer shkelje të ligjit për Kthimin dhe Kompensimin e pronës gjatë kohës në të cilën ushtronin funksionet e sipërpërmendura.

Në dosje mungojnë konfirmimet nga institucionet përgjegjëse në zbatim të ligjit në fuqi. Janë shmangur korrespondencat dhe bashkëpunimi me autoritetet kompetente në administrim të të cilave ka qenë prona e kthyer.

Në dosjet përkatëse janë vënë re shkelje të cilat kanë të bëjnë me procesin e aplikimeve, verifikimeve në terren, shqyrtimit të akteve nga grupi i punës, shqyrtimi nga Sektori Juridik dhe Kontrollit dhe vendimmarrja e Drejtorit të Kthimit dhe Drejtorit të Përgjithshëm të AKKP.

Kryerja dhe moskryerja me dashje e veprimeve dhe mosveprimeve të kundraligjshme nga ana e zyrtarëve bie qartë në kundërshtim me ligjin Nr. 9235, datë 29.07.2004 “Për Kthimin dhe Kompensimin e Pronave”, VKM nr. 255, datë 13.04. 2010 “Për procedurat e mbledhjes, përpunimit dhe administrimit të akteve të subjekteve të shpronësuara, gjatë procesit të njohjes dhe kthimit apo kompensimit të pronës”, dhe përbëjnë mospërmbushje të rregullt të detyrës nga punonjësve përgjegjës të cilët kanë dëmtuar dhe interesat e institucionit “Garda e Republikës”.

Për këtë arsye, thuhet në njoftim, bazuar në nenin 281, të Kodit të Procedurës Penale i Republikës së Shqipërisë, për personat e lartpërmendur, AKKP kërkon regjistrimin e procedimit penal për veprën penale të parashikuara në nenet 248 “Shpërdorimi i detyrës”dhe 25 “Bashkëpunimi i personave për kryerjen e veprës penale ” të Kodit Penal të Republikës së Shqipërisë”.

komunikatë për shtyp

Dërgo me email | Stampo artikullin