24/03/2014 18:32:03

Spanjë, të plagosur në protesta

Në momentin e shpërndarjes, shpërthyen përleshje të ashpra në qendër të Madridit mes grupeve prej dhjetëra të rinjsh

MADRID - Shërbimet e urgjencës numëruan 101 të plagosur, të gjithë lehtë, në incidentet që pasuan dje në mbrëmje në Madrid një manifestim gjigant kundër masave shtrënguese qeveritare, të një game të paprecedentë që prej vitit 2012, ndërsa 24 persona janë arrestuar nga policia.

Rreth 300 persona morën pjesë në Madrid në një asamble për të diskutuar lidhur me vijimësinë e marshimeve të indinjatës, nisur nga rajone të ndryshme të Spanjës, disa në këmbë për t’u dyndur dje në kryeqytet.

Manifestuesit e mbledhur sot përballë muzeut të artit modern Reina Sofia, të rrethuar nga policë me veshjet e skuadrave të ndërhyrjes së shpejtë, do të dalin përsëri në mbrëmje në sheshin “Puerta del Sol”, në qendër të Madridit, që ishte pikënisja simbolike e manifestimeve të “të indinjuarve” në pranverën e vitit 2011.

Ata do të protestojnë kundër mbajtjes nën mbikëqyrje të 24 personave të arrestuar gjatë incidenteve të mbrëmshme. Dhjetëra mijëra persona morën pjesë në marshimin gjigant zhvilluar dje me thirrjen e shumë organizatave civile dhe profestionale për të denoncuar emergjencën sociale, papunësinë që prek më tepër një në katër persona të aftë për punë në Spanjë dhe polikën e masave shtrënguese të ndërmarrë nga qeveria e djathtë që prej më tepër se dy vjetëve.

Në momentin e shpërndarjes, shpërthyen përleshje të ashpra në qendër të Madridit mes grupeve prej dhjetëra të rinjsh, të cilët hidhnin gurë dhe sende të forta dhe policisë që përdori plumba plastikë për t’i shpërndarë.

HermesNews - ©2014

Dërgo me email | Stampo artikullin