24/03/2014 09:30:17

Fillon fushata për presidentin e ri të vendit

Katër kandidatë për zgjedhjet e raundit të parë që do të mbahen me datë 13 prill

SHKUP - Fushata që do të çojë në zgjedhjen e presidentit të ri të vendit filloi sot në Maqedoni. Ajo zgjat 20 ditë dhe kandidatë për postin e presidentit janë Iljaz Halimi i PDSH-së, presidenti aktual Gjorge Ivanov i VMRO-DPMNE-së, Stevo Pendarovski i LSDM-së dhe Zoran Popovski i partisë GROM.

PDSH-ja nuk zhvillon fushatë me mitingje, por me banorët. Kandidati Iljaz Halimi do të paraqesë sot pasdite platformën e tij në një miting në komunën e Çairit. VMRO-DPMNE-ja fushatën presidenciale do ta fillojë në Ohër, prej ku rregullisht fillon aktivitetet e saj zgjedhore.

Ivanov paraqiti dje në Shkup programin e tij për zgjedhjet e ardhshme. Në Konventën në Sallën Universale në Shkup, LSDM-ja sot do të promovojë kandidatin presidencial, Pendarovski.

Raundi i parë i zgjedhjeve të pesta presidenciale do të zhvillohet më 13 prill, ndërsa raundi i dytë më 27 prill, kur janë caktuar edhe zgjedhjet e parakohshme parlamentare.

HermesNews - ©2014

Dërgo me email | Stampo artikullin