21/03/2014 13:50:46

Moska nuk ul çmimin e gazit për Ukrainën

Me bashkimin e Krimesë me Rusinë, termi i uljes së çmimit të gazit akorduar Ukrainës për bazën e Flotës së Detit të Zi nuk ekziston më

MOSKË - Rusia njoftoi sot pezullimin e zbritjes së çmimit që do t’i akordonte Ukrainës në lidhje me çmimin e gazit në këmbim të përdorimit të një baze detare në Krime, pas vendimit të marrë kohët e fundit me anulimin e një tjetër zbritjeje të çmimit. “Me bashkimin e Krimesë me Rusinë, termi i uljes së çmimit të gazit akorduar Ukrainës për bazën e Flotës së Detit të Zi nuk ekziston më”, deklaroi në të përditshmen ekonomike “Vedomosti”, Dmitri Peskov, zëdhënësi i presidentit rus, Vladimir Putin. “Ajo tashmë nuk mund të përdoret më as ‘de jure’ as ‘de facto”, shtoi Peskov. ”De jure, flota nuk ndodhet më në bazën e Ukrainës, por në territorin e një rajoni të Rusisë”, deklaroi zëdhënësi në një tjetër të përditshme, ”Kommersant”. Ulja prej 100 dollarësh për 1 000 metra kub ishte vendosur mes presidentit ukrainas, mbështetës i Kremlinit, Viktor Janukoviç dhe presidentit rus në atë kohë Dmitri Medvedev në prill 2010 në kuadër të zgjatjes së një marrëveshjeje të pranisë së Flotës së Detit të Zi në Krime.

HermesNews - ©2014

Dërgo me email | Stampo artikullin