14/03/2014 14:05:53

23 kg drogë në port

Lënda narkotike u bllokua në mjediset e portit të Vlorës

VLORE - Policia e Vlorës bllokoi dhe sekuestroi 23 kg lëndë narkotike të llojit kanabis sattiva, të cilat do të trafikoheshin drejt Italisë, ndërkohë që arrestoi dy persona të dyshuar si transportues.

Burime zyrtare të Drejtorisë së Kufirit dhe Migracionit bënë të ditur se, lënda narkotike u bllokua në mjediset e portit të Vlorës gjatë procedurave të kontrollit të mjeteve që do të imbarkoheshin në tragetin e linjës Vlorë-Brindisi.

“Mbi bazën e analizës së riskut është ushtruar kontroll në automjetin tip Citroen me targa AA 772 IL, brenda të cilit në sediljen e pasme janë gjetur të fshehura 20 pako me lëndë narkotike kanabis sativa me peshë 23 kg”, saktësuan burimet e policisë. Për këtë u shoqëruan shtetasit Dritan Refat Omeri (Zavalani), vjec 31, banues ne lagjen “ Liri” Fier, pronari i automjetit dhe Elvis Ramazan Zykaj, 24 vjeç gjithashtu nga qyteti i Fierit.

Gjatë veprimeve hetimore të kryera në lidhje me këtë rast nga efektivat e Luftës Kundër Narkotikëve në Drejtorinë e Policisë Qarku Vlorë u vendos që dy të shoqëruarit të arrestohen në kushtet e flagrancës për veprën penale të trafikimit të lëndëve narkotike, e mbetur në tentativë.

HermesNews - ©2014

Dërgo me email | Stampo artikullin