05/03/2014 17:34:10

Georgio Napolitano nderohet me ''Flamurin Kombëtar''

''Presidenti i Republikës, Bujar Nishani i jep Shkëlqesisë së tij, Giorgio Napolitano dekoratën e Flamurit Kombëtar për rolin e jashtëzakonshëm si politikan me karrierë të gjatë e të pasur, me kontribut e ndikim të madh në politikën italiane''

TIRANË - Presidenti i Republikës Italiane, Giorgio Napolitano u nderua sot në një ceremoni zyrtare në Tiranë me “Dekoratën e Flamurit Kombëtar”, akorduar nga Presidenti i Republikës, Bujar Nishani.


“Presidenti i Republikës, Bujar Nishani i jep Shkëlqesisë së tij, Giorgio Napolitano dekoratën e “Flamurit Kombëtar për rolin e jashtëzakonshëm si politikan me karrierë të gjatë e të pasur, me kontribut e ndikim të madh në politikën italiane, në forcimin e marrëdhënieve mes Italisë dhe Shqipërisë në mbështetjen që ajo i ka dhënë vendit e popullit tonë gjatë periudhës kalimtare për realizimin e reformave demokratike, si avokate e integrimit euroatlantik, si dhe për pritjen bujare e trajtimin dinjitoz të emigrantëve shqiptarë”, thuhet në motivacionin e dekorimit akorduar nga Kreu i Shtetit, i cili i dorëzoi presidentit Napolitano dekoratën e lartë.ceremonia e dekorimit (3)

Ceremonia zyrtare në Pallatin e Brigadave, vijoi më pas me nderimin për Presidentin Nishani, të cilit, homologu italian, Napolitano i dorëzoi personalisht nderimin më të lartë italian, Urdhërin e Meritës së Republikës, “Gradën e Kalorësit të Kryqit të Madh”, i vlerësuar me Dekoratën e Kordonit të Madh.

“Kjo dekoratë italiane i jepet në njohje të meritave të veçantë Presidentit të Republikës së Shqipërisë, Bujar Nishani, si dhe për të shenjuar më tej lidhjet e ngushta të miqësisë e bashkëpunimti mes dy vendeve e popujve tanë, të konfirmuara edhe gjatë kësaj vizite shtetërore”, thuhet në motivacionin e dekorimit.

Në vijim të qëndrimit në Tiranë, Presidenti Napolitano do të takohet dhe me kryetarin e Kuvendit, Ilir Meta, ndërsa në orët e pasdites ai do t’i drejtohet parlamentit shqiptar me një fjalë përshëndetëse.

HermesNews - ©2014

Dërgo me email | Stampo artikullin