20/02/2014 17:28:06

PD fillon protestat, dhjetoristët përkujtojnë

Police femra kontrollojnë situatën para kryeministrisë. Simpatizantët e PDsë shpërndahen paqësisht. Basha, fillim i protestave antiqeveritare

TIRANE - Protesta e paralajmëruar e demokratëve ka ndarë 20 shkurtin në Shqipëri.

Dhjetoristët përkujtojnë ngjarjen në qytetin studenti, në sallën "Liria '90", aty ku në vitet 90-të u mbajt greva e urisë.

Shoqata "Studentët e Dhjetorit", kishte bërë thirrje për t'a kujtuar ditën e rrëzimit të bustit të Enver Hoxhës në një eveniment brenda sallës në orën 18:00.

Ndërsa Partia Demokratike ka mbledhur sot simpatizantët në sheshin Skënderbej dhe para kryeministrisë për të kërkuar dorëheqjen e qeverisë Rama.

Vetëm 6 muaj pas humbjes së zgjedhjeve, demokratët fajvsojnë qeverinë nuk po i mban premtimet dhe për zhytjen e vendit në krizë për shkak të "klientalizmit të Edi Ramës", sipas Bashes.

"Specifike e kësaj proteste, është zotimi për të marrë pjesë të gjithë pjesëtarët e familjes, çka nuk është e zakonshme. Sot Tirana, po të kishte mundësi regjistrimi në darkë, mund t'ju them se ndoshta edhe është dyfishuar nga të ardhurit, plus pastaj qytetarët e Tiranës, të cilët kanë kulturën e tyre të qëndresës më të zhvilluar, ndaj do të jetë një protestë madhështore", tha sot ish kryeministri Berisha, aktualisht njeriu më me influencë në PD.

Qytetarë nga e gjithë Shqipëria udhëtuan drejt Tiranës për t'u bërë pjesë e protestës. Transporti u organizua nga PD.

"Jemi sot këtu para se e keqja të prekë fundin, para se të humbasim sërish statusin në qershor. Ja ku jemi, hapni sytë, barrikadë vendimtare kundër oligarkisë, kundër blerjes së pushtetit nga mafja dhe oligarkët e rinj, kundër kthimit mbrapa", tha Lulzim Basha para simpatizantëve, i cili e akuzon Ramen se është antieuropian, akuza që prekin ndjeshmërinë e qytetarëve shqiptarë të cilët në pjesën më të madhe të tyre janë në favor të integrimit të vendit në BE.

Basha tha se kjo është protesta e parë antiqeveritare duke lënë të kuptohet se të tjera do të ketë në vijim. Gjashtë muaj më parë, demokratët patën një prej humbjeve më të thella në votime. Pas kësaj ish kreu historik, Sali Berisha mori përsipër humbjen duke dhënë dorëheqjen nga posti. Aktualisht ai është krahu i djathtë i Lulzim Bashës dhe një prej emrave më me influencë në selinë blu.

Protesta e demokratëve vjen në një kohë ku brenda Bashkimit Europian ka pakënaqësi të forta për menaxhimin që Ukraina po i bën revoltave në vend. Situata brenda BEse me ndarjet që ekzistojnë brenda vendeve dhe thirrjet e ambasadës se BEsë për dialog, me siguri që nuk ia bëjnë të lehtë rrugën e integrimit të vendit në BE, mbi të gjitha sepse fjala "protesta" është ende acaruese në veshët e qytetarëve. Na ndiqni dhe në Facebook dhe Twitter //HermesNews - ©2014//

Doriana Metollari

Dërgo me email | Stampo artikullin