18/02/2014 16:34:27

Vlejnë deri në vitin 2023

Të gjitha bankat, degët e bankave të huaja dhe zyrat e këmbimit valutor do të pranojnë për këmbim deri në datën 31 dhjetor të vitit 2023 kartëmonedhat që tashmë e kanë humbur kursin e tyre ligjor

TIRANE - Banka e Shqipërisë do të zëvendësojë deri në fund të vitit 2023, çdo kartmonedhë të skaduar me vlerën e tyre reale. Kujt i kanë mbetur ende kartmonedha, që nuk mund të përdoren më, nuk duhet t’i konsiderojë si lek të humbur, pasi ka afat edhe për 10 vjet që t’i ndërrojë ato me kartmonedha të reja. Të gjitha bankat, degët e bankave të huaja dhe zyrat e këmbimit valutor do të pranojnë për këmbim deri në datën 31 dhjetor të vitit 2023 kartëmonedhat që tashmë e kanë humbur kursin e tyre ligjor dhe do t’i dërgojnë ato menjëherë pranë Bankës së Shqipërisë dhe degëve të saj.

Aktualisht, është në fuqi një Vendim i Bankës së Shqipërisë lidhur me një gjë të tillë, që përcakton se kartëmonedhat pa kurs ligjor do të mblidhen për këmbim, kundrejt pagesës së vlerës fillestare të emetimit, me kartëmonedha dhe monedha të tjera në qarkullim. Do të mund të zëvendësohen në këtë mënyrë kartmonedhat: 100 lekë, emetim i viteve 1993, 1994, 1996, imazhi i Luftëtarit Kombëtar; 100 lekë, emetim i vitit 1996, imazhi i Fan S. Nolit; 200 lekë, emetim i viteve 1992, 1994, 1996, imazhi i Ismail Qemalit; 500 lekë, emetim i vitit 1991, 1992, 1993, 1996, 1997, imazhi lule dielli; 500 lekë, emetim i vitit 1992, 1994, 1996, imazhi i Naim Frashërit dhe 1000 lekë, emetim i vitit 1992, 1994, 1995, 1996, imazhi i Skënderbeut. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin