13/02/2014 19:24:44

Furgonat kthehen në taksi ose shërbim urban

Kryeministri Rama tha sot se shoferët do të kenë kohë për të vendosur se çfarë duan të bëjnë. Të premten nisin bisedimet për modelin e ri të transportit ndërurban

TIRANE - "Tansporti publik nuk mund të funksionojë më pa rend ligjor, pa konkurrencë të ndershme, pa kontroll teknik të besueshëm, pa stacione, dhe pa drejtime", tha sot Kryeministri Rama në Parlament.

"Udhëtari sot kërkon siguri, ne duam siguri në këtë sektor. Udhëtari sot kërkon inovacion. Ajo që ndodhi në Tiranë që shërbimi i mjeteve 8 plus 1 nuk u konsiderua më një shërbim urban , por u kthye në një shërbim taksi krijoi hapësirën për të ndërtuar shërbimin urban me standarde europiane", tha kryeministri.

Ai tha se asnjë mjet i palicencuar nuk do të lejohet të transportojë udhëtarë dhe furgonat nuk mund të vijojnë të mbajnë jashtë ligjit rolin e shërbimit interurban, duke falimentuar kompani të tëra autobusësh.

"Qeveria nuk do të lejojë më qarkullimin e mjeteve të palicencuara. Do t'u japë kohë për t'u riorganizuar të gjithë atyre që kanë një liçencë të rregullt dhe që duhet të bëjnë një zgjedhje nëse do të kalojnë në shërbimin taksi normal, apo shërbimin urban brenda rrethit të përcaktuar nga autoriteti që jep licencën për ta. Qeveria do të ndërmarrë projektin për inovacionin dhe transformimin e gjithë sistemit të transportit tonë publik", deklaroi shefi i qeverisë.

Ministri i Punëve të Brendshme, Saimir Tahiri tha sot se të premten do të nisin bisedimet me përfaqësues të ligjshëm të transportit ndërurban, për të ndërtuar modelin e transportit ndërqytetas, që siç tha ai, do të garantojë sigurinë e udhëtarëve dhe standarde moderne. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin